फागुन ३, काठमाडौं । आराध्यदेव भगवान् शिवको पूजा–आराधना गरिने प्रमुख पर्व ’महाशिवरात्रि’ आज देशभर उत्साहका साथ मनाइँदैछ।
फागुन कृष्ण चतुर्दशीका दिन मनाइने यस पर्वका अवसरमा काठमाडौँको पशुपतिनाथसहित मुलुकभरका शिवालयहरूमा बिहानैदेखि भक्तजनको ठूलो भिड लागेको छ।
पशुपति क्षेत्र विकास कोषका अनुसार आज पशुपतिनाथको दर्शनका लागि नेपाल तथा भारतका विभिन्न स्थानबाट लाखौँ दर्शनार्थी र हजारौँको सङ्ख्यामा साधुसन्तहरू आएका छन्। भक्तजनको सहजताका लागि पशुपति क्षेत्रमा सुरक्षा व्यवस्था कडा पारिएको छ भने दर्शनका लागि छुट्टाछुट्टै लाइनको व्यवस्था मिलाइएको छ।
भगवान् शिवको प्रिय दिन मानिने आजको दिन भक्तजनहरूले व्रत बस्ने, पवित्र नदीमा स्नान गर्ने र शिवलिङ्गमा दूध, जल, बेलपत्र तथा धतुरो चढाउने गर्दछन्। “शिवजीलाई जाडो भयो“ भन्ने लोक मान्यताका आधारमा आज साँझ प्रत्येक घर, चोक र मन्दिरमा ’धुनी’ जगाएर भजनकीर्तन गर्दै रातभर जाग्राम बस्ने परम्परा रहेको छ।
पशुपतिनाथ मात्र नभई ललितपुरको कुम्भेश्वर, भक्तपुरको डोलेश्वर, खोटाङको हलेसी, चितवनको देवघाट र पोखराका प्रसिद्ध शिवालयहरूमा पनि भक्तजनको बाक्लो उपस्थिति रहेको छ। पर्यटक र स्थानीयको सहभागिताले मन्दिर क्षेत्रहरूमा विशेष व्यापारिक तथा सांस्कृतिक चहलपहल बढेको छ। सर सरकारले सार्वजनिक बिदा समेत दिएको छ ।
