काठमाडौं । अन्तर्राष्ट्रिय कर सम्मेलन २०२५ नेपालमा हुने भएको छ । नेपाल च्याम्बर अफ ट्याक्स कन्सल्टेन्ट्सले गर्वका साथ घोषणा गर्दछ कि एओटीसीए २०२५ अन्तर्राष्ट्रिय कर सम्मेलन मंसिर २ देखी ५ गतेसम्म (नोभेम्बर १८ देखि २१) द सोल्टी काठमाडौमा आयोजना हुने भएको जानकारी दिएको हो ।
यो कार्यक्रम एसिया-ओसियान ट्याक्स कन्सल्टेन्ट्स एसोसिएसन (एओटीसीए) को समन्वयमा सञ्चालन हुँदैछ, जसले एसिया र ओसियान क्षेत्रका २० भन्दा बढी देशका कर व्यवसायिक संस्थाहरूलाई एकताबद्ध गरेको छ ।
सन् १९९२ मा स्थापना भएको एशियन-ओसियान टयाक्स कन्सल्टेन्ट्स एसोसिएसनले कर परामर्श व्यवसायमा उच्च नैतिक मापदण्ड, व्यावसायिक उत्कृष्टता र समावेशी तथा दिगो आर्थिक विकासलाई प्रोत्साहन गर्ने कर सुधारहरूलाई समर्थन गर्दै आएको छ।
नेपालको कर प्रणालीको विकसित रूप प्रदर्शन गर्ने र नेपाली कर व्यवसायीहरूलाई अन्तर्राष्ट्रिय विशेषज्ञहरूसँग जोड्ने लक्ष्य राखेको छ । यस्तै नेपालका कर र वित्त व्यवसायीहरूको व्यावसायिक क्षमता अभिवृद्धि गर्ने, कर नीति र अनुपालनमा अन्तर्राष्ट्रिय सर्वोत्तम अभ्यासहरूको आदानप्रदान र नेटवर्किङलाई प्रवर्द्धन गर्ने तथा प्रत्यक्ष वैदेशिक लगानी प्रवर्द्धन तथा कर र लगानी क्षेत्रमा अन्तर्राष्ट्रिय सहकार्य विस्तार गर्ने यसको मुख्य उदेश्य रहेको छ ।
विकासशील देशहरूको कर प्रणालीको ऐतिहासिक विकास, उदाउँदो अर्थतन्त्रहरूमा कर नीति कार्यान्वयनका चुनौतीहरू, विश्वव्यापी कर अनुपालनमा कर व्यवसायीहरूको भूमिका र कर प्रशासनमा डिजिटल रूपान्तरणका अवसर र चुनौतीहरू जस्ता विषयहरू समावेश हुनेछन् ।
अन्तर्राष्ट्रिय कर सम्मेलन मा ३५० जना अन्तर्राष्ट्रिय प्रतिनिधि र २०० जना नेपाली कर व्यवसायी, नीतिनिर्माता, सरकारी अधिकारी, व्यवसायी तथा अन्तर्राष्ट्रिय विज्ञहरूको सहभागिता रहने बताइएको छ ।
