काठमाडौं । भोजपुरको रामप्रसाद राई गाउँपालिका–२ धोद्लेखानी शनिबार मध्यरातिको एक बीभत्स हत्या घटनाले सबैलाइ चकित बनाएको छ । स्थानीयका लागि त्यो रात सामान्य रहेन, गाउँले एउटा परिवार नै गुमाउन पुग्यो ।
भोजपुर नगरपालिका–२ हेलौचाका ३० वर्षीय राजेन्द्र राईले ससुरालीका चार जना सदस्यको हत्या गरेको प्रहरीको प्रारम्भीक अनुन्धानबाट खुलेको छ । मृतकमध्ये उनकी श्रीमती पनि थिइन्, १६ वर्षीया मनिषा गिरि । करिब ९ महिनाअघि उनीहरूको प्रेम विवाह भएको थियो । उक्त अन्तरजातीय प्रेम विवाहलाई राजेन्द्रको ससुरारी पक्षले नस्विकार्दा परिवार नै समाप्त भएको छ ।
राजेन्द्र केही दिनदेखि श्रीमती लिन ससुराली गाउँमै थिए । शनिबार जसरी भए पनि मनिषालाई लिएर फर्किने अठोटका साथ पुगेका थिए उनी । तर ससुराली पक्ष छोरी लैजान नदिने पक्षमा थिएनन ।
सोहि विषयमा विवाद चर्कँदै गएपछि हिंसात्मक रूप लिएको थियो । ससुरालीले छुरा निकालेर आक्रमण गर्न थालेपछि गरेपछि उनले त्यही छुरा खोसेर चारै जनाको हत्या गरेको प्रहरीलाई राजेन्द्रले बयान दिएको प्रहरीले जनाएको छ ।
६८ वर्षीय ससुरा बेलबहादुर गिरि, ४५ वर्षीया सासू मञ्जु गिरि, ९ वर्षीय सालो सपन गिरि र श्रीमती मनिषा गिरि राईको आक्रोशको सिकार बने । हत्यापछि राईले आफैंले प्रहरी कन्ट्रोलमा फोन गरी भनेका थिए, ‘मैले मान्छे मारेँ, मलाई लिन आउनू ।
उनको पेटको तीन ठाउँमा गहिरो चोट देखिएको छ । सामूहिक हत्याअघि ससुराली पक्षले आफूमाथि छुरा प्रहार गरेको दाबी उनले प्रहरीसमक्ष बयानमा गरेका छन् ।
जिल्ला अस्पताल भोजपुरमा प्रहरी निगरानीमा राईको उपचार भइरहेको छ । अवस्था गम्भीर भएकाले थप उपचारका लागि अन्यत्र सिफारिस गर्न सकिने प्रहरीले जनाएको छ ।
राजेन्द्र भोजपुर सदरमुकाममा डेरा गरी बस्ने निर्माण मजदुर हुन् । आर्थिक रूपमा सामान्य अवस्थाका उनी प्रेम विवाहपछि गिरि परिवारसँग असझदारी बढेको जनाइएको छ ।
