कास्कि। एनसेल फाउन्डेसन नेपाल लिटरेचर फेस्टिभल–२०२५ कास्किको पोखरामा बिहीबारदेखि सुरु भएको छ ।
एनसेल फाउन्डेसनको सहकार्यमा १२औं संस्करणको फेस्टिभल फागुन १५ गतेदेखि १८ गतेसम्म पोखरामा हुनलागेको हो ।बुकवर्म फाउन्डेसनको आयोजनामा हुन लागेको फेस्टिभल पोखराको बाराहीघाट, लेकसाइडमा भइरहेको छ ।
सूचना सञ्चार तथा प्रविधि मन्त्री पृथ्वीसुब्बा गुरुङले पानसमा वत्ति बालेर कार्यक्रमको औपाचारीक उद्घाटन गर्नुभयो । फेस्टिभलमा देश–विदेशका दुई सयभन्दा बढी साहित्यकार, राजनीतिज्ञ, लेखक, कलाकार, पत्रकार, सम्पादक एवम् विशिष्ट व्यक्तित्वहरूको उपस्थिति रहने जनाइएको छ ।
फेस्टिभलमा ५० भन्दा बढी छलफल सत्र, अन्तरक्रियात्मक कार्यक्रम, साङ्गीतिक प्रस्तुति र अन्य रचनात्मक कार्यक्रम समावेश रहेको आयोजकले जानकारी दिएको छ ।
प्राध्यापक तथा अर्थशास्त्री महेन्द्र पी लामाले विद्वत् प्रवचनमा दिनेछन्। उनी इन्दिरा गान्धी ओपेन युनिभर्सिटी (आईजीएओयू) को प्रो–उपकुलपति र भारतको सिक्किम विश्वविद्यालयका संस्थापक उपकुलपति समेत हुन्।
अध्यात्म र सङ्घर्षमाथि मनीषा कोइराला र विजय कुमारको विशेष संवाद रहेको छ। अभिनेता राजेश हमालको पुस्तक ‘युगदेखि युगसम्म’को आवरण तथा पुस्ताकांश सोही फेस्टिभलमा लोकार्पण हुँदैछ।
