रुद्रबहादुर खड्का । बैशाख १८ सिन्धुली । नेपाल रेडक्रस सोसाइटी सिन्धुली जिल्ला शाखाले नि:शुल्क रगत उपलब्ध गराउने भएको छ । निशुल्क रगतको लागि रेडक्रसले १ करोड ६२ लाखको अक्षयकोष स्थापना गरेको हो ।
२०८० साल देखि अक्षयकोष स्थापनाका लागि एक करोड ५० लाख संकलन अभियान सुरु गरेको थियो । उक्त अभियान अन्तरगत हाल सम्ममा १ करोड ५० लाख ५१ हजार रुपैयाँ रकम जम्मा भएको रेडक्रस सिन्धुलीका सभापति अशोक श्रेष्ठले जानकारी दिए ।
‘उक्त कोषमा जिल्लाका विभिन्न तिनवटा गाउँपालिकाहरुले १२ लाख रुपैयाँ सहयोग गर्ने प्रतिबद्धता सहित सम्झौंता भएको र केही दिन भित्र उक्त रकम निकासा हुँदा कुल १ करोड ६२ लाख ५१ हजार रुपैयाँको अक्षयकोष तयार हुनेछ,’ उनले भने । यो नागरिक स्तरबाट सहयोग जुटाएर बनाइएको जिल्लाकै सबैभन्दा ठुलो अक्षयकोष हो । अक्षय कोषमा जिल्लाको कमलामाई र दुधौली नगरपालिका, सुनकोसी गाउँपालिका, मरिण गाउँपालिका, फिक्कल गाउँपालिका, गोलन्जोर गाउँपालिका र तिनपाटन गाउँपालिकाले पाँच÷पाँच लाख रुपैयाँ सहयोग गरेका छन् ।
यस्तै हरिहरपुरगढी र घ्याङलेख गाउँपालिकाबाट दुई/दूई लाख रुपैयाँ सहयोेग गर्ने सहमति भएको श्रेष्ठले बताए । जिल्लाका विभिन्न गैरसरकारी संघ÷संस्था, व्यक्ति, बैंक तथा सहकारी लगायतका वित्तिय संस्थाहरुबाट कोष स्थापना गर्न सहयोग प्राप्त भएको छ । बैदेशिक रोजगारीमा गएका जिल्लावासीले पनि अक्षयकोष स्थापनाका लागि सहयोग गरेका छन् ।
अक्षयकोष स्थापनाका लागि सहयोग गर्ने ९ सय ५० जना व्यक्ति तथा संघसंस्थाका प्रतिनिधि साथै पत्रकारलाई एक औपचारिक कार्यक्रमकोबिच सम्मान गरिएको थियो । सिन्धुली निर्वाचन क्षेत्र नम्बर २ का प्रतिनिधि सभा सदस्य लेखनाथ दाहाल (राजन) को प्रमुख आतिथ्यतामा सम्मान कार्यक्रम भएको हो ।
कार्यक्रमलाई सम्बोधन गरैदै प्रतिनिधि सभा सदस्य लेखनाथ दाहाल (राजन) ले गरिब र विपिन्न बर्गलाई सहज तरिकाले उपचारका लागि निशुल्क रगत उपलब्ध गराउन अक्षयकोषको स्थापना भएको बताए । अक्षयकोषबाट जिल्लाका नागरिकलाई जुनसुकै अस्पतालमा उपचार गदाृ आवश्यक पर्ने रगत निशुल्क पाउन सक्ने उनले बताए । रेडक्रस सिन्धुलीले जिल्लामा ब्लड बैंकको स्थापना गरी सेवा दिँदै आएको छ ।
