सर्वाेच्च अदालतको ३२औँ प्रधानन्यायाधीशका रूपमा प्रकाशमानसिंह राउतले कार्यभार सम्हालेका छन् । आइतबार राष्ट्रपति रामचन्द्र पौडेलबाट पद तथा गोपनीयताको शपथ लिएलगत्तै उनले पदबहाली गरेका हुन् ।
सर्वाेच्च अदालतमा नियुक्त भएको आठ वर्षकै अवधिमा उनी न्यायालयको सर्वाेच्च पदमा पुगेका हुन् । राउतले १८ चैत ०८२ सम्म न्यायालयको नेतृत्व सम्हाल्नेछन् ।
२०४० मा कानुन व्यवसाय सुरु गरेका राउत ०७३ को साउनमा न्यायाधीश नियुक्त भएका हुन् । ३३ वर्ष वकालत र आठ वर्ष न्यायसम्पादनमा बिताएका राउत न्याय क्षेत्रमा औसत क्षमताका र ठुलो विवादमा नपरेका व्यक्तिका रूपमा चिनिन्छन् ।
पदबहालीपछि उनले न्यायालयको साख र विश्वसनीयता बढाउन आफू लाग्ने बताएका छन् । संसदीय सुनुवाइका क्रममा राउतले अदालतभित्र हुने भ्रष्टाचार रोक्न सूक्ष्म निगरानी संयन्त्र बनाउने बताएका थिए ।
विश्वम्भरप्रसाद श्रेष्ठले उमेरहदका कारण अनिवार्य अवकाश पाएपछि राउत प्रधानन्यायधीशमा नियुक्त भएका हुन् । राउतसँगै अबको करिब १२ वर्ष कानुन व्यवसायीबाट सीधैै सर्वाेच्चमा नियुक्त भएकाहरूको नेतृत्वमा न्यायालय पुग्नेछ ।
राउतपछि सपना प्रधान मल्ल, कुमार रेग्मी र हरि फुयाँल प्रधानन्यायाधीशको रोलक्रममा छन् । उनीहरू सबै कानुनी व्यवसायीबाट सिधैं सर्वाेच्चमा न्यायाधीश बनेका हुन् ।
न्यायाधीश नियुक्तिमा कानून व्यवसायी पृष्ठभुमी भएकाहरू हावी हुँदा ‘क्याडर जज’हरू पछि परेको भन्दै पछिल्लो समय न्यायालयमा आवाज उठ्न थालेको छ ।
सोही कारण गत वर्ष न्याय परिषद्ले न्याय परिषद् नियमावली संशोधन गरी ‘सर्वोच्चका मुख्य रजिस्ट्रार र न्याय सेवाको सचिव उच्च अदालतमा नियुक्त हुँदा मुख्य न्यायाधीश बनाइने वा मुख्य न्यायाधीश पछि राखिने’ व्यवस्था गरेको थियो । यसले कानुन व्यवसायी पृष्ठभूमिका न्यायाधीश पछि पर्ने भन्दै नेपाल बार एसोसिएसनले आन्दोलन गर्दै आएको छ ।
