जेठ १४, काठमाडौँ । नेकपा एकीकृत समाजवादी पाटी निकट पत्रकार संस्था समाजवादी प्रेस संगठन नेपालले पत्रकार महासंघकाे सञ्चारग्रामस्थित केन्द्रीय कार्यालयमा तालाबन्दी गरेको छ ।
संगठनले तीनबुँदे माग राखेर महासंघमा साेमबार तालाबन्दी गरेको हो । संगठनले राखेका मागहरुमा नेपाल पत्रकार महासंघको सदस्यता सूचीको नाममा निश्चित संगठनको स्वार्थ पुरा गर्नका निम्ति गरिएको षड्यन्त्र स्वीकार्य छैन ।
जिल्ला शाखाबाट शिफारिस भएका गैर पत्रकार तथा शुद्धीकरणको मापदण्डभित्र नपर्ने व्यक्तिका नाम रातारात राख्ने काम भएको छ । त्यस्ता नाम तत्काल खारेज गरियोस ।
सदस्यता शुद्धीकरणका नाममा भएका पूवाग्रहपूर्ण कार्य सच्याइ महासंघ नेतृत्व विभिन्न संघ, संगठनबिचको सहमतिमा मात्र सदस्यता सूची जारी गरियोस भन्ने रहेको छ ।
नेपाल पत्रकार महासंघको सदस्यता शुद्धीकरण प्रकृयाले लामो समय लिदाँ यही जेठ २६ गते हुने नेपाल पत्रकार महासंघको केन्द्र, प्रदेश र शाखामा नेतृत्व चयनका लागि हुने निर्वाचन पेचिलो बन्दै गएको छ ।
०७९ पुस ८ र ९ गते सुर्खेतमा सम्पन्न नेपाल पत्रकार महासंघको केन्द्रीय साधारणसभाले नेपाल पत्रकार महासंघका सदस्यको शुद्धीकरणलाई थप प्रभावकारी बनाउन विधानको व्यवस्थाअनुरुप आगामी निर्वाचनमा कार्यान्वयन हुने गरी अद्यावधिक गर्न निर्देश गरेको थियो ।
नेपाल पत्रकार महासंघको विधान २०६० (पाँचौं संसोधन २०७५) को परिच्छेद २ को सदस्यता प्रकार र योग्यता सम्बन्धि नियमको (८) मा नयाँ सदस्यता स्वीकृत, अनुमोदन र स्थान्तरण गर्ने कार्य सम्बन्धित समितिको निर्वाचन हुनभन्दा ६ महिना पहिले भइसक्नुपर्ने उल्लेख छ ।
यस्तै सदस्यता प्रकार र योग्यता सम्बन्धि नियमको ५(१) घ मा सदस्यता विवाद उत्पन्न भए महासंघको प्रदेश समितिले छानबिन गर्नसक्ने उल्लेख छ ।
यसैबिच अन्तिम चरणमा रहेकाे महासंघकाे सदस्यता शुद्धीकरण प्रकृयाप्रति असन्तुष्ट जनाउदै नेपाल पत्रकार महासंघ केन्द्रीय समितिमा नेपाल प्रेस युनियन निकट केही केन्द्रीय सदस्यहरुले आइतबार महासंघका पदाधिकारीको कार्यकक्षमा ताला लगाएका थिए ।
