काठमाडाैं । अपर तामाकोशी जलविद्युत परियोजनाको सब–स्टेसन निर्माणका लागि सशस्त्र प्रहरीको क्याम्प राख्न लागेपछि काठमाडौँको शंखरापुर नगरपालिका वडा नम्बर ३ जहरसिंह पौवामा स्थानीय र प्रहरीबिच झडप भएको छ ।
झडपमा डिएसपी देवराज राईसहित ३ प्रहरी घाइते भएका छन् भने प्रहरीले १० जना स्थानीयलाई पक्राउ गरेको छ ।
शुक्रबार साँझ भएको झडपमा ३ प्रहरी घाइते भएका थिए भने ४ जना पक्राउ परेका थिए । शनिवार पनि स्थानीयले सब–स्टेसन निर्माणको विरुद्धमा आन्दोलन जारी राखेका छन् । शनिवार बिहान ६ जना स्थानीय पक्राउ परेका छन् । यस्तै ५ जना स्थानीय महिला पक्राउ गर भन्दै स्वतःस्फूर्त रूपमा प्रहरीसँग आएको प्रहरीले जनाएको छ ।
शनिबार तुलाराम लामा, मानबहादुर तामाङ, दीपक लामा, राजमान स्याङबो, अशोक तामाङ पक्राउ परेका छन् । शुक्रबार साँझ सूर्यमान तामाङ, मनिष तामाङ, सुकुमान वाइवा र मानबहादुर तामाङ पक्राउ परेका हुन् । उनीहरूलाई प्रहरीमाथि ढुङ्गामुडा गरेको अभियोगमा पक्राउ गरिएको हो ।
सब–स्टेसन निर्माण अघि बढाउनेबारे बिहीबार नेपाल विद्युत् प्राधिकरण, शंखरापुर नगरपालिका, इलाका प्रशासन कार्यालय साँखु, स्थानीयबासी लगायतबीच छलफल भएको थियो । सबै पक्षको साझा सहमति बनाएर अघि बढ्ने कुरा भए पनि आयोजनास्थलमा एक्कासि सशस्त्र प्रहरीको क्याम्प राख्न गएपछि स्थानीय आन्दोलनमा उत्रिएको शंखरापुर नगरपालिकाका प्रवक्ता राधाकृष्ण श्रेष्ठले जानकारी दिए ।
प्रवक्ता श्रेष्ठले प्रहरीले घर–घरमा पुगेर स्थानीयलाई पक्राउ गर्दा समस्या बल्झिएको बताएका छन् ।
एमसिसी परियोजनाको प्रशारणलाईन जहरसिंह पौवा हुँदै नुवाकोटको रातोमाटे लैजाने योजना रहेको छ । स्थानीयले बस्तीबिचबाट प्रसारण लैजान नहुने र सवस्टेशन बनाउँन नहुने भन्दै सो स्थानबाट आयोजना अन्यत्र सार्न माग गर्दै आन्दोलन गरिरहेका छन् । शनिवारपनि आयोजना स्थलमा स्थानीयले विरोध प्रदर्शन गरिरहेका छन् ।
