काठमाडौं ।७ आश्विन , राष्ट्रपति रामचन्द्र पौडेलले प्रेस स्वतन्त्रताको पूर्ण प्रत्याभूति दिलाउन सके मात्रै लोकतान्त्रिक शासन व्यवस्था फस्टाउन सक्ने बताउनुभएको छ ।
प्रेस काउन्सिल नेपालद्वारा शनिबार राष्ट्रपति कार्यालय शीतल निवासमा आयोजना गरिएको काउन्सिलको ५४औं वार्षिकोत्सव तथा पुरस्कार वितरण समारोहमा प्रमुख अतिथिको रूपमा बोल्दै राष्ट्रपति पौडेलले कुनै पनि देशमा त्यो देशको प्रेस स्वतन्त्रताको अवस्थाले लोकतन्त्र कुन अवस्थामा छ भन्ने कुराको निक्र्यौल हुने बताउनुभयो । प्रेस स्वतन्त्रता बिना लोकतन्त्रको संस्थागत विकास हुन नसक्ने ठोकुवा गर्दै उहाँले लोकतान्त्रिक शासन व्यवस्था अवलम्बन गर्ने मुलुकहरूले प्रेस स्वतन्त्रताको गहिरो हेक्का राख्नुपर्ने आवश्यकता औंल्याउनुभयो ।
राष्ट्रपति पौडेलले लोकतान्त्रिक शासन व्यवस्था नभए प्रेस पनि अघि बढ्न नसक्ने स्पष्ट पार्नुभयो । उहाँले २०४६ सालको जनआन्दोलनको सफलतापछि नेपालमा सबैभन्दा बढी विकसित भएको क्षेत्र नै प्रेस जगत रहेको र त्यसयता नै नेपालमा मिडिया क्रान्ति भएको बताउनुभयो । राष्ट्रपति पौडेलले प्रेस काउन्सिल एउटा इतिहास बोकेको गौरवशाली संगठन भएकाले यसको गरिमा बढाउन सरोकारवाला पक्ष संवेदनशील बन्नुपर्नेमा जोड दिनुभयो ।
राष्ट्रपति पौडेलले आफू पनि कुनै बेला सामान्य पत्रकार रहेको स्मरण गर्दै पञ्चायतकालमा नेपाली प्रेसले विभिन्न संकट र समस्याहरू व्यहोर्न परे पनि नेपाली प्रेस कहिल्यै पनि विचलित नभएको भन्दै प्रेस जगतको प्रशंसा गर्नुभयो । पछिल्लो समय मिडिया क्षेत्रमा केही विकृतिहरू देखिएकोमा चिन्ता व्यक्त गर्दै राष्ट्रपति पौडेलले मिडियाले आफूलाई जिम्मेवार र उत्तरदायीपूर्ण बनाउनुपर्ने आवश्यकता औंल्याउनुभयो । पौडेलले मिडिया क्षेत्रलाई जिम्मेवार र इमान्दार बनाउन प्रेस काउन्सिलको महत्वपूर्ण भूमिका रहने भएकाले काउन्सिलले सो भूमिकालाई सशक्त रूपमा अगाडि बढाउनुपर्नेमा जोड दिनुभयो ।
