भदौं १० काठमाडौं । बागमती प्रदेशका पूर्वमुख्यमन्त्री डोरमणी पौडेलले युवावर्गलाई देशको नेतृत्व गर्न आग्रह गर्नुभएको छ । उहाँले शुभचिन्तक र नागरिक समाजले फेरीपनि उम्मेद्वारी दिन भनेतापनि कुनै क्षेत्रबाट उम्मेद्वार नबन्ने बताउनुभयो ।
शुक्रबार फेसबुक स्ट्याटस मार्फत उहाँले राजनीति लहड, रहर र दवावले मात्रै नचल्ने बताउनु भयो । आवश्यकताको वस्तुपरक मूल्याङ्कनले निर्धारण गरेका कडिहरुका आधारमा उम्मेद्वार चयनगर्न चुकियो भने परिणाम अनपेक्षित हुनसक्छ भन्ने कुराको हेक्का राख्नुपर्नेमा आफ्नो ५ दशक भन्दा लामो राजनीतिक अनुभवले देखाएको छ, ।
अहिले देशले साच्चै नै परिवर्तन खोजेको छ । परिवर्तनकालागि सारा देश जागेको बेला परिवर्तनको संवाहक नेकपा (एमाले) लाई चौतर्फी घेराबन्दी गरी नामेट बनाउने प्रयासमा देशी तथा विदेशी शक्तिहरु एकजुट भएर लागिपरेका छन् ।
यस्तो बेला आगामी निर्वाचनमा कस्ता खालका ब्यक्तिहरुलाई जिताएर पठाउने भन्ने नेपाली जनताको हातमा छ । सञ्चार माध्यमहरु तथा सामाजिक सञ्जालहरुमा आगामी निर्वाचनका सम्भावित उम्मेद्वारहरुकाबारेमा चर्चा परिचर्चा पनि शुरु भइसकेको छ । त्यही क्रममा मेरो नामजोडेर पनि केहि चर्चा हुनेगरेको छ ।
अहिलेको समाजले विगतमा परीक्षण भइसकेका जनप्रतिनिधिको सट्टामा नयाँ अनुहार खोजेको यथार्थलाई हामीले अनदेखावा नजरअन्दाज गर्न मिल्दै मिल्दैन । त्यसैले आगामी निर्वाचनमा मेरो उमेदवारी हुनुपर्छ भन्ने तमाम मेरो शुभचिन्तक, नागरिक समाज, युवा विद्यार्थी तथा पत्रकारहरु प्रतिहार्दिक कृतज्ञता व्यक्तगर्दै आगामी निर्वाचनमा मेरो कुनै पनि क्षेत्रबाट उमेदवारी नरहने जानकारी गराउँदछु ।
यो पटक जनचाहाना अनुसार नयाँ पुस्तालाई मेरो समर्थन र सहयोग रहने छ । दोस्रो पुस्तामात्रै हैन अहिले नाति पुस्ता समेत देशको नेतृत्व हाँक्न तयार र सक्षम भएर बसेका छन् ।
