काठमाडौं । पुष २२, नेपाल उद्योग वाणिज्य महासङ्घका अध्यक्ष चन्द्र प्रसाद ढकालले डेडीकेटेड फिडर र ट्रंक लाइन महसुल विवाद तत्काल समाधान गर्नुपर्ने बताए ।नाडा अटोमोबाइल्स एसोसिएसन अफ नेपाल (नाडा) को ४७औँ वार्षिक साधारण सभामा बोल्दै अध्यक्ष ढकालले यस्तो बताएका हुन् । उनले अर्थमन्त्रीबाट नै यसको समाधान खोजिनुपर्ने बताए ।
डेडीकेटेड फिडर र ट्रंक लाइन महसुल बक्यौता नतिरेको भन्दै नेपाल विद्युत् प्राधिकरणले पुस ६ गतेबाट उद्योगहरूको लाइन काट्न सुरु गरेको छ । सोही सन्दर्भमा ढकालले यस्तो बताएका हुन् । उनले भने,‘उद्योगी र विद्युत् प्राधिकरणबिच देखिएको डेडिकेटेड र ट्रंक लाइन विवाद दुई साता बितिसकेको छ । यो समस्याको समाधान तत्काल गर्नुपर्छ’, उनले थपे, ‘उद्योग वाणिज्य महासङ्घले सुरुमा नै हाम्रो विद्यमान निकायहरू विद्युत् प्राधिकरण, विद्युत् नियमन आयोग, ऊर्जा मन्त्रालय वा अन्य कुनै निकायबाट समाधान हुन्छ भने समाधान गरौँ भनेर हामीले भनेको हो ।’
अध्यक्ष ढकालले सो समस्या समाधान गर्नका लागि न्यायिक आयोग बनाएर गर्न सकिने बताए । ‘म अर्थमन्त्रीलाई के आग्रह गर्न चाहन्छु भने, हाम्रो भएका निकायबाट समस्याको समाधान हुन सक्छ भने त्यहीँबाट समाधान गरौँ । यदि होइन भने एउटा न्यायिक आयोग गठन गरी तीन, चार साताको समय दिऔँ र समस्या समाधान गरौँ’, अध्यक्ष ढकालले बताए ।
उक्त समस्या तत्काल सट आउट गर्न नसके यसले विकराल रूप लिने ढकालको भनाई छ । उनले भने,‘अहिले विद्युत् लाइन काटिएको उद्योगहरूमा ८५ हजार हाराहारीमा मजदुरहरू आश्रित छन् भन्ने गरिएको छ, यदि यो समस्याको तत्काल समाधान गर्न नसकिएमा विकराल रूप लिनेछ ।’
