डेँगू विरुद्ध सचेत रहन मेयर बालेनको आग्रह

काठमाडौं । काठमाडौं महानगरका मेयर बालेनले डेँगू राेगको प्रकोप बढिरहेको भन्दै त्यसप्रति सचेत रहन सबैलाई आग्रह गरेका छन । सामाजिक सञ्जाल फेसबुकमार्फत मेयर बालेनले भनेका छन्
डेँगूको प्रकोप बढ्दो छ । घरघरमा डेँगूका बिरामीहरु बढिरहेका छन् । जाडो आएर डेँगू आफै जान्छ भनेर कसैले पनि जाडो नपर्खौँ ।
डेङ्गुको प्रकोप रोक्नका लागि महानगरले केहि अगाडिबाट नै विशेष कार्यक्रम चलाइरहेको छ । वडाको आकार अनुसार ठुला वडाहरुमा रु १ लाख, मध्यमका लागि रु ७५ हजार तथा साना वडाहरुमा रु ५० हजारका दरमा बजेट छुट्याइएको छ ।
तर, यो प्रयत्न पनि अपुग भएको छ । किनकि महानगर मात्रैले यो प्रकोपलाई तत्काल रोक्न गाह्रो छ । यसमा हामी सबैको भुमिका रहन्छ ।
पहिलो त उपलब्ध स्रोत साधनको प्रयोग गरेर लामखुट्टेको टोकाइबाट बच्नुहोस् ।
दोस्रो, लामखुट्टेले थोरै भन्दा थोरै पानी भएको ठाउँबाट पनि बच्चा फैलाउन सक्छ । यसैले कृपया ! सडकमा हिड्दा बोतलको बिर्को जति सानो कुरा छ भने पनि उल्टाइदिनुहोला, ताकि पानी जम्मा नहोस् । पानी जम्मा भएको ठाउँ छ भने घोप्ट्याइदिनुहोस् ।
तेस्रो, डेँगूबाट संक्रमण हुनु भएको छ भने स्वास्थ्यकर्मीहरुको सल्लाह अनुसार व्यवहार गर्नुहोस् ।