काठमाडौं । अमेरिकी डलर साटिदिन्छु भनेर लुटपाट गरेको आरोपमा प्रहरीले ३ जनालाई पक्राउ गरेको छ ।
अमेरिकी डलर साट्ने प्रलोभन देखाएर ललितपुरको हरिसिद्धिबाट १८ लाख, काठमाडौंको चोभारबाट १८ लाख र ललितपुरको इमाडोलबाट १० लाख रुपैयाँ लुटपाट गरेको आरोपमा प्रहरीले सिन्धुपाल्चोक बाह्रबिसेका सुकलाल पाइन, इनकुमार पाख्रिन र सूर्यबहादुर पाइनलाई पक्राउ गरेको हो ।
काठमाडौं उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीका अनुसार उनीहरु गत ३० चैतमा ललितपुरको ढुंगेली बसपार्कबाट पक्राउ परेका हुन् ।
पक्राउ परेका सुकलाल पाइन यसअघि २०७६ सालमा डाँकाचोरी कसुरमा पक्राउ परेर मुद्दा चलेका व्यक्ति रहेको रेग्मीले बताए । पक्राउ परेकाहरुमाथि अनुसन्धानका लागि उपत्यका अपराध अनुसन्धान कार्यालयले प्रहरी वृत्त सातदोबाटोमा पठाएको छ ।
