– खगेन्द्र फुयाँल
जेठ २०, काठमाडौं । जलकन्या चपौली काठमाडौं उपत्यका सरोकार समाजले अग्रज सम्मान तथा भेटघाट कार्यक्रम सम्पन्न गरेको छ। शनिबार ललितपुरमा भएको कार्यक्रममा सिन्धुलीको चपौलीमा जन्मिएर गाँउ, जिल्ला र देशका लागि योगदान गर्ने स्व.स्थानेश्वर देवकोटालाई मरणोपरान्त र डा.दिनेश शर्मा काफ्लेलाई सम्मान गरेको छ ।
भेलाले बासुदेव देवकोटाको अध्यक्षतामा तेह्र सदस्यीय कार्यसमिति गठन गरेको छ । उपाध्यक्षमा सुर्यबहादुर श्रेष्ठ, सचिवमा माधवप्रसाद देवकोटा, कोषाध्यक्षमा रमेशप्रसाद गौतमलाई चयन गरेको छ । सदस्यहरुमा लिलानाथ चौलागाइ, माधवप्रसाद आचार्य, देवकुमारी गौतम, विश्वप्रसाद दंगाल, सञ्जय स्याङ्बा, दिपकराज देवकोटा, शंकरप्रसाद चौलागाई, ठाकुरप्रसाद पहाडी, बिन्दा न्यौपाने रहेका छन् । त्यसैगरी उक्त भेलाले जलकन्या मावि भुतपुर्व विद्यार्थी समाज प्रस्ताव गरेको छ ।
बागमती प्रदेश सांसद बुजुला बर्माको संयोजनमा गठिन समाजको सदस्यहरमा रमेशप्रसाद सिग्दले, पारस फुयाँल , फणीन्द्र फुयाँल र माधव आचार्य सदस्य रहनु भएको छ । आगामी बैठकले कर्यसमिति गठन गर्ने जलकन्या चपौली काठमाडौं उपत्यका सरोकार समाजका सचिव माधवप्रसाद देवकोटाले बताए । कार्यक्रमम उपस्थित प्रमुख अतिथि तथा राष्ट्रिय योजना आयोगका अध्यक्ष डा.रामकुमार फुयाँलले गठित कार्यसमितिलाई बधाइ दिदै दलीय राजनीति भन्दा माथि उठेर चपौलीको विकासमा लाग्न सबैलाई आग्रह गर्नुभयो ।
चपौलीले देशका लागि विभिन्न क्षेत्रमा योग्य व्यक्ति उत्पादन गरेको भन्दै आफ्नो जन्मस्थानका लागि सबैले आफुसंग भएको क्षमता र सिपको योगदान गरे चपौलीको विकासमा कोसेढुंङ्गो सावित हुने धारणा राख्नुभयो । उहाँले आर्थिक ०८१/८२ को बजेटमा चपौलीको विकासका लागि पनि बजेट विनियोजन भएको भन्दै सार्वजनिक हितमा सबैले अपनत्व लिएर विकासको गुणस्तर र समयमै सम्पन्न गर्न खबरदारी गर्नुपर्ने बताउनुभयो ।
बागमती प्रदेश सांसद तथा नेपाली कांग्रेस नेतृ बिजुला बर्माले आफ्नो जन्मस्थानका रुपमा रहेको चपौलीको चौतर्फी विकासका लागि सक्दो सहयोग गर्ने बताउनुभयो । उहाँले गाँउको शैक्षिक र स्वास्थ्य क्षेत्रमा आगामी दिनमा समेत सहयोग गर्ने प्रतिवद्धता व्यक्ति गर्नुभयो ।
कमलामाई नगरपालिका वाडा नम्बर तीन चपौलीका वडा अध्यक्ष खड्गप्रसाद चौलागाइले कानुनी परिधिमा रहेर वडाले संस्थालाई आवश्यक सहयोग गर्ने प्रतिवद्धता व्यक्त गर्नुयभो । उहाले कर्मथलो जहा भएपनि जन्मथलोका रुपमा वडाको विकासका लागि सबैले आआफ्नो स्थानबाट सहयोग गर्न उपस्थित सबैलाई आग्रह गर्नुभयो । सम्मानित डा.दिनेश शर्मा काफ्लेले आफुले विगतमा गाँउको शैक्षिक क्षेत्रमा योगदान गरेको स्मरण गर्दै काठमाडौं आएपछि पनि विभिन्न परियोजनामार्फत जिल्लाको ग्रामिण भेगमा स्वास्थ्य क्षेत्रमा सहयोग गरेको स्पष्ट पार्नुभयो ।
त्यसैगरी स्व.स्थानेश्वर देवकोटाकी धर्मपत्नी गोमा देवकोटाले पनि विगतका आफ्ना सम्झनाहरु व्यक्ति गर्नुभयो । लगातार तीनपटसम्म जलकन्या गाँउ पञ्चायतका अध्यक्ष (प्रधानपञ्चमा) निर्वाचित हुनुभएका रामकुमार बर्माले गाँउको (हाल मावि) स्कुल र स्वास्थ्य चौकी स्थापना गर्दाको संघर्ष बारेमा जानकारी गराउनुभयो । उहाँले उक्त समयमा आफुले व्यक्तिगत स्वार्थ नराखी गाँउवासीको हितमा काम गरेको बताउनुभयो ।
साबिक जलकन्या गाविसबाट विभिन्न कालखण्डमा काठमाडौं उपत्यकामा आइ बसोबास गर्दै आएका स्थानीयबिच आपसी सहयोग र नियमित भेटघाटका लागि कार्यक्रम आयोजना गरिएको समाजको अध्यक्ष बासुदेव देवकोटाले बताउनुभयो । नवनिर्वाचित समितिका उपाध्यक्ष सुर्यबहादुर श्रेष्ठले स्वार्थभन्दा माथि उठेर चपौलीको विकासमा साथ र सहयोगका लागि सबैलाई आग्रह गर्नुभयो ।
कार्यक्रममा चपौलीबाट काठमाडौं बसोबास गर्दै आउनुभएका असीज स्थानीयको उपस्थिति रहेको थियो ।
