काठमाडौं । नेकपा (एमाले)का अध्यक्ष केपी शर्मा ओलीले हरेक नागरिक सधैँ देशको पहरेदार हुने र हुनुपर्ने हुँदा राष्ट्रप्रतिको कर्तव्य कहिल्यै पूरा नहुने बताउनुभएको छ ।
नेपाल राष्ट्रिय भूतपूर्व सैनिक तथा प्रहरी सङ्गठनले बुधवार आयोजना गरेको शुभकामना आदान प्रदान कार्यक्रममा अध्यक्ष ओलीले सेना र प्रहरी सरकारी सेवाबाट भूतपूर्व भए पनि देशको सेवाबाट कहिल्यै भूतपूर्व नहुने बताउनुभयो ।
नेकपा (एमाले) देशका तमाम समस्या समाधानका साथै ‘समृद्ध नेपाल, सुखी नेपाली’को राष्ट्रिय आकांक्षा पुरा गर्ने अभिभारा काँधमा बोकेर हिँडेको पार्टी भएकाले यो पार्टी सम्पूर्ण रूपमा आफ्ना अवयवसहित गतिशील रहेको उहाँले बताउनुभयो ।
देश अहिले अराजकतातर्फ गइरहेको बताउँदै अध्यक्ष ओलीले यस्तो बेलामा हरेक नागरिकलाई अनुशासन सिकाउन आवश्यक रहेको बताउनुभयो । उहाँले भन्नुभयो– यस्तो बेलामा अनुशासित जीवन विताउनुभएका भूतपूर्व सैनिक तथा प्रहरीहरूको संगठन समाजमा अनुशासनको महत्व सिकाउन उपयुक्त माध्यम हुने छ ।
नागरिकलाई अनुशासनको पाठ सिकाउन सकियो भने मात्र सभ्य समाज निर्माण हुने उहाँको भनाइ छ ।
हामी नेपाली विद्वत्ता र वीरताले चिनिएका महान् पुर्खाका सन्तान भएको चर्चा गर्दै अध्यक्ष ओलीले अब देशको विकास, समृद्धि, सुशासन र सुखका लागि काम गर्नुपर्ने भएकाले पार्टीको जनसंगठनका रूपमा रहेको भूतपूर्व सैनिक तथा प्रहरी संगठनले यस दिशामा महत्वपूूर्ण भूमिका निर्वाह गर्नुपर्ने बताउनुभयो ।
पार्टीका बरिष्ठ उपाध्यक्ष ईश्वर पोखरेलले यतिबेला समाजमा अराजकता र जातीय विद्वेष फैलाउने प्रयास भइरहेको र सत्तामा रहनेहरूबाटै सुरक्षा निकायमा समेत अराजकताको बिष छर्ने कोसिस भइरहेकाले भूतपूर्व सैनिक तथा प्रहरी संगठनले खबरदारी गर्नुपर्ने बताउनुभयो ।
उहाँले बडादसैँले सामाजिक सद्भाव अभिवृद्धि गर्दै राष्ट्रिय एकता बलियो बनाउने सन्देश दिन सकोस् भनी शुभकामना व्यक्त गर्नुभयो ।
कार्यक्रममा शुभकामना मन्तव्य व्यक्त गर्दै महासचिव शंकर पोखरेलले एमालेलाई बलियो राष्ट्रिय शक्तिको रूपमा स्थापित गर्ने सङ्कल्प साकार पार्ने कामका साथै पार्टीको समृद्धि यात्रामा भूतपूर्व सैनिक तथा प्रहरी संगठनले महत्वपूर्ण योगदान गर्न सक्नुपर्ने बताउनुभयो ।
महासचिव पोखरेलले मुलुकको राष्ट्रियता, भौगोगिक अखण्डता, स्वाधीनता र सार्वभौमसत्ताको रक्षामा नेकपा (एमाले) र यसका अध्यक्ष केपी शर्मा ओलीले सत्ता रहँदा होस् वा प्रतिपक्ष जहाँ रहँदा पनि नेतृत्वदायी भूमिका निर्वाह गरेको र देशको शिर उँचो पारेको बताउनुभयो ।
संगठनका अध्यक्ष विनोद पाण्डेको अध्यक्षतामा भएको कार्यक्रममा नेकपा (एमाले)का केन्द्रीय सदस्य तथा संगठनका इन्चार्ज यज्ञराज सुनुवार, संगठनका उपाध्यक्ष रवीन्द्र पण्डित लगायतले मन्तव्य व्यक्त गर्नुभएको थियो । कार्यक्रममा संगठनका भूतपूर्व इन्चार्ज लगायत संगठनमा महत्वपूर्ण योगदान गर्नुहुनेहरूलाई सम्मान गरिएको थियो भने कलाकारहरूले गीत तथा नृत्य प्रस्तुत गरेका थिए ।
