काठमडौं । नेपाल पत्रकार महासंघले कान्तिपुर मिडिया ग्रुपमा देखिएको श्रम समस्याप्रति नेपाल पत्रकार महासंघले गम्भीर ध्यानाकर्षण भएको जनाएको छ ।
कान्तिपुर मिडिया ग्रुपले त्यहा कार्यरत कर्मचारी तथा पत्रकारलाई बलजफ्ती निश्काशन गरेको भन्दै आन्दोलन जारी छ ।
महासंघले सोमबार जारी गरेको विज्ञप्तीमा भनिएको छ ‘नेपाल पत्रकार महासंघले जेठ ३० गते प्रेस विज्ञप्तिमार्फत त्यस संस्थामा देखिएको श्रम समस्या समाधानका लागि आग्रह गरेको थियो ।
त्यसपछि पनि मिडिया ग्रुपमा आवद्ध पत्रकार–कर्मचारी तथा कामदारलाई विभिन्न वहानामा संस्थाबाट विदा गर्ने प्रयास गरिएको गुनासो महासंघमा प्राप्त भएको छ ।
पत्रकारले समयमै पारिश्रमिक नपाउने, लामो समय काम गरेर संस्थालाई योगदान गरेका पत्रकारलाई जबरजस्ती हट्न बाध्य बनाउने, स्थायी पत्रकार तथा कर्मचारीलाई अस्थायी÷करारमा रुपान्तरण गर्ने, सरुवा गर्नेलगायतका काम विद्यमान कानुनी व्यवस्थाविरोधी काम भएको महासंघको ठहर छ ।
श्रमजीवी पत्रकार ऐन र प्रचलित कानुन सर्वोच्च अदालतसमेतको आदेशअनुसारका सेवा सुविधा तत्काल उपलब्ध गराउन महासंघ कान्तिपुर व्यवस्थापन पक्षसँग पुनः आग्रह गर्दछ । अन्यथा महासंघ अन्यायमा परेका श्रमजीवी पत्रकारलाई निःशुल्क कानुनी उपचार उपलब्ध गराउन र दबाबमूलक आन्दोलन गर्न बाध्य हुने जानकारी गराइन्छ ।
श्रमजीवी पत्रकार ऐन र सर्वोच्च अदालतको फैसला कार्यान्वयनका लागि हाल भइरहेको आन्दोलनका क्रममा पत्रिका वितरणसमेत प्रभावित भइरहेकोले वार्ता र संवादको प्रक्रियाबाट तत्काल समस्या समाधानका लागि महासंघ कान्तिपुर मिडिया ग्रुपको ध्यानाकर्षण गराउँदछ ।’
