काठमाडौं , पुस २९ , प्रधानमन्त्री पुष्पकमल दाहाल ‘प्रचण्ड’ र नेकपा (एमाले) का अध्यक्ष केपी शर्मा ओलीबीच बिहीबार साँझ बालुवाटारमा छलफल भएको छ।बालुवाटारमाभएको भेटमा मन्त्रिपरिषद् विस्तारबारे विस्तृत छलफल भएको प्रधानमन्त्रीको सचिवालयले जनाएको छ।
नेकपा माओवादी केन्द्रका अध्यक्षसमेत रहेका प्रचण्डको सचिवायका अनुसार छलफलको एजेन्डा मन्त्रिपरिषद् विस्तादेखि सभामुख र राष्ट्रपतिको निर्वाचनसम्म केन्द्रित थियो।सङ्घीय र प्रदेश सरकारको मन्त्रालय भागबण्डा, सभामुख, उपसभामुख, राष्ट्रपति र उपराष्ट्रपतिको निर्वाचनलसहितका राजनीतिक विषयमा दुईजनाबीच लामो छलफल भएको छु, प्रचण्डको सचिवालयका एक सदस्यले भने।
बुधबार मात्रै सातवटै प्रदेश सरकार निर्माण भएका छन्। चारवटामा एमाले, दुईमा माओवादी र एउटामा जनता समाजवादी नेतृत्वको सरकार बनिसकेको छ।यस्तोमा गत पुस ११ गते गठित सङ्घीय मन्त्रिपरिषद्लाई पूर्णता दिने विषयमा दुईजनाबीच छलफल भएको हो। पुस ११ गते प्रधानमन्त्रीसँगै ७ मन्त्रीले सपथ लिएका थिए। जसमा चार मन्त्रीले अझै जिम्मेवारी पाएका छैनन्।
यसका साथै प्रदेश सरकारलाई पनि पूर्णता दिन बाँकी छ। बुधबार मात्रै प्रधानमन्त्री दाहाल गोरखाबाट फर्किएपछि बालकोट पुगेर अध्यक्ष ओलीसँग मन्त्रिपरिषद् विस्तारलगायत विषयमा छलफल गरेका थिए।
प्रधानमन्त्री दाहालले प्रतिनिधिसभाबाट मङ्गलबार दुईतिहाइ बढी विश्वासको मत प्राप्त गरेका छन्।
प्रतिनिधिसभामा उनको पक्षमा २६८ र विपक्षमा २ मत परेको थियो। राष्ट्रपति विद्यादेवी भण्डारीले माओवादी अध्यक्ष दाहाललाई पुस १० गते प्रधानमन्त्रीमा नियुक्त गरेकी थिइन्।
यस्तोमा प्रचण्डले कांग्रेसको समेत विश्वासको मत पाएपछि मन्त्रिपरिषद्लाई पूर्णता दिने गृहकार्य सुरु भएको हो।पुस ११ गते उपप्रधानमन्त्री तथा अर्थमन्त्री विष्णु पौडेल,माओवादी केन्द्रका वरिष्ठ उपाध्यक्ष नारायणकाजी श्रेष्ठ उपप्रधानमन्त्री एवम् भौतिक पूर्वाधार तथा यातायातमन्त्री र राष्ट्रिय स्वतन्त्र पार्टीका अध्यक्ष रवि लामिछाने उपप्रधानमन्त्री तथा गृहमन्त्रीले सपथ लिएका थिए।
एमालेबाट राजेन्द्र राई, ज्वालाकुमारी साह र दामोदर भण्डारीले विनाविभागीय मन्त्रीमा सपथ लिएका थिए। जनमतका अब्दुल खानले पनि विनाविभागी मन्त्रीको सपथ लिएका छन्।बिहीबार बालुवाटार वार्तामा विनाविभागीय मन्त्रीलाई भूमिका दिने निष्कर्षमा दुई नेता पुगेका छन्।त्यस्तै अहिले प्रधानमन्त्रीले सम्हालिरहेका १७ वटा मन्त्रालय बाँडफाँटबारे पनि दुई नेताले सहमति खोजी गरेका छन्।
बिहीबार दुई नेता बसेपछि अब सत्ता साझेदार सात दलको बैठक राख्ने तयारी छ। त्यस बैठकमा अन्य दलका मन्त्री पनि टुंग्याउने तयारी छ।
