काठमाडाैं । एक वर्षको अवधिमै २०९ जना जनप्रतिनिधिविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा गरेको छ। आर्थिक वर्ष २०७९/८० को वार्षिक प्रतिवेदन राष्ट्रपतिलाई बुझाएपछिको पत्रकार सम्मेलनमार्फत् अख्तियारले उक्त विषय सार्वजनिक गरेको हो।
अख्तियारका प्रवक्ता भोला दाहालले आर्थिक वर्ष २०७९/८० मा ७६६ जनाविरुद्ध मुद्दा दायर गरिएकोमा २०९ जनप्रतिनिधि रहेको बताए। स्थानीय तहदेखि केन्द्रसम्मका निर्वाचित तथा मनोनित गरेर एक आर्थिक वर्षमै २०९ जनप्रतिनिधिविरुद्ध मुद्दा दायर भएको हो। आर्थिक वर्ष २०७९/८० मा जम्मा १६२ वटा मुद्दा अख्तियारले विशेष अदालतमा मुद्दा दर्ता गरेको थियो।
जसमा ६२२ पुरुष, १३८ महिला र ६ जना गरी ७६६ जनाविरुद्ध मुद्दा दायर गरिएको थियो। उनीहरुविरुद्ध १ अर्ब ७४ करोड ५२ लाख १६ हजार ६३४ रुपैयाँ बिगो माग दाबी गरिएको छ।
यसरी मुद्दा दायर भएकामध्ये १ जना विशिष्ट श्रेणीका कर्मचारी छन् भने १० जना सह–सहिवस्तरका कर्मचारी छन्। त्यसैगरी उप–सचिवस्तरका कर्मचारी ५८ जना, शाखा अधिकृतस्तरका कर्मचारी १४६ जना गरी अधिकृतस्तरमा २१४ जनालाई मुद्दा चलाइएको अख्तियारले जनाएको छ।
त्यसैगरी नासुस्तरका ११० जना, खरिदारस्तरका कर्मचारी ३० जना, सहायक/सहयोगी कर्मचारी ४ जनाविरुद्ध भ्रष्टाचारको मुद्दा दायर गरिएको छ। बिचौलिया तथा मतियारको रुपमा १५८ जनाविरुद्ध मुधा दायर गरिएको प्रवक्ता दाहालले जानकारी दिए।
आर्थिक वर्ष २०७९/८८० मा १६२ मुद्दा दायर भएकोमा सबैभन्दा बढी गैरकानुनी लाभ वा हानीको कसुर अन्तर्गत ६४ वटा मुद्दा दर्ता भएका छन्। त्यसपछि घुस/रिसवत सम्बन्धी ३२ वटा, सार्वजनिक सम्पत्ति हानी नोक्सानी सम्बन्धी २७, गैरकानूनी सम्पत्ति आर्जन सम्बन्धी १३, झुटा तथा नक्कली शैक्षिक प्रमाणपत्र सम्बन्धी ८ वटा, राजश्व चुहावट तथा हिनामिना सम्बन्धी ७ र विवधि ११ वटा गरी १६३ वटा मुद्दा दर्ता गरिएको प्रवक्ता दाहालले जानकारी दिए।
