काठमाडौं । स्मार्ड फोनको दुनियमा बादशाहा रहेको एप्पलले आइफोनको नयाँ संस्करण सार्वजनिक गरेको छ । आइफोन १५ र १५ प्लसमा थप उन्नत स्क्रिन र क्यामेरा सिस्टम हुनेछ । जबकि महँगो आईफोन १५ प्रो र प्रो म्याक्समा टाइटेनियम फ्रेम हुनेछ जसले फोनलाई थप बलियो बनाउनेछ ।
एप्पलले सार्वजनिक गरेको आफ्नो नयाँ आईफोनमा लाइटनिङ चार्जिङ पोर्टको सट्टा सी–टाइप चार्जिङ पोर्ट भएको पुष्टि गरेको छ । युरोपेली सघंको सुझावमा कम्पनीले उक्त सुविधा ल्याएको हो । अहिलेसम्म, आईफोनमा अन्य फोनभन्दा छुट्टै लाइट चार्जिङ पोर्ट थियो, जुन आईफोनको पहिचान पनि थियो ।
तर अब एप्पलले यसलाई परिवर्तन गर्ने निर्णय गरेको छ । मंगलवार एप्पलले आफ्नो नयाँ सिरिजको घडी पनि सार्वजनिक गरेको छ । यसमा पहिले भन्दा धेरै उन्नत चिप हुने जनाएको छ ।
नयाँ आईफोन अर्को सातादेखि बजारमा उपलब्ध हुनेछ । यो सन् २०१२ पछि पहिलो आईफोन हुनेछ जसमा वैकल्पिक चार्जिङ पोर्ट हुने कम्पनिले जनाएको छ ।
कम्पनीले दिएको जानकारी अनुसार पहिलेदेखि नै एप्पलका धेरै ल्यापटप र आइप्याड मोडलमा काम गर्ने युएसबी–सी टाइप केबलले एयरपड्स प्रो र वायर्ड इयरपड हेडफोनहरूको नयाँ संस्करणहरूमा पनि काम गर्नेछ ।
युरोपेली युनियनले एप्पललाई ग्राहकको सुविधाका लागि आफ्नो छुट्टै लाइटनिङ चार्जिङ पोर्ट त्याग्न भनेको थियो । यसले मानिसहरूको पैसा मात्रै बचत हुँदैन ई–वेस्ट पनि कम हुनेछ किनभने चार्जरलाई पुनः प्रयोग गर्न सकिनेछ ।
एप्पलले मंगलवार आफ्नो लन्च कार्यक्रममा वातावरण सम्बन्धी धेरै प्रतिज्ञाहरू पनि गरेको थियो । एप्पलले आफ्नो वाच रेन्जको उत्पादनहरू पहिलो पटक कार्बन न्युट्रल हुने बताएको छ ।
नयाँ आईफोन र वाचमा थप रिसाइकल सामग्रीहरू प्रयोग गर्नेछन् । यसमा ब्याट्रीहरू पनि समावेश हुनेछन् । कम्पनीले आफ्नो कुनै पनि सामान तथा उत्पादनमा छालाको प्रयोग नगर्ने बताएको छ । कम्पनीले सन् २०३० सम्ममा कार्बन न्युट्रल बन्ने वाचासमेत गरेको छ ।
एप्पलका प्रमुख टिम कुकले नयाँ आईफोन १५ कम्पनीले बनाएको अहिलेसम्मकै उत्कृष्ट र शक्तिशाली आईफोन हुने बताएका छन् । प्रो र प्रो म्याक्समा म्युट स्विचको सट्टामा ‘एक्सन बटन’ हुनेछ, जुन विभिन्न फङ्सनका लागि तपाईंको आवश्यकता अनुसार सेट गर्न सकिन्छ ।
आइफोन १५ नयाँ एप्पल वाचमा जेस्चर कन्ट्रोल पनि हुनेछ । घडी लगाएको हातमा दुई औँलाले ट्याप गर्दा घडी लगाउनेले फोन उठाउन र काट्न सक्नेछन् । धेरै विज्ञहरू यो पनि विश्वास गर्छन् कि यी नयाँ उत्पादन र पुराना उत्पादनबीच धेरै भिन्नता नहुँदा पनि ग्राहकहरू यी नयाँ उत्पादनका लागि उच्च मूल्य तिर्न तयार हुनेछन् ।
बेलायतमा आइफोन १५ प्रोको मूल्य ९९९ पाउन्ड अर्थात् एक लाख ६४ हजार रुपैयाँ हुनेछ । आइफोन १५ पीपी फोरसाइटका संस्थापक तथा विश्लेषक पाउलो पेस्केटोर भन्छन्, ‘सबै कुरा महँगो भइरहेका बेला ग्राहकहरूलाई बढी खर्च गर्न लगाउन सजिलो छैन ।’
