काठमाडौं । काभ्रेको धुलिखेल नगरपालिकाको देविस्थान डाँडाबाट ब्यवसायीक रुपमा प्याराग्लाईडिङ्ग सुरु गरिएको छ ।
धुलिखेल नगरपालिका वडा नम्बर ९ स्थित देविस्थानबाट धुलिखेल ८ बडाल गाउँसम्म पुग्ने गरी ५५ सय फिट उचाइमा उडानका लागि अनुमति पाएको जनाइएको छ ।
ब्यवसायीक उडानका लागि प्राप्त अनुमतिका आधारमा आवश्यक मापदण्ड पूरा गरेर औपचारिक उडान सुरु गरेको सञ्चालकले जनाएको छ।
संचालकहरु किरण कार्की, दावा लामा, दिपक चौलागाई लगायतले २५ लाख रुपैयाँ भन्दा धेरै लगानी गरी पोखरामा सञ्चालन भएका प्याराग्लाईडिङ्ग कम्पनीहरुको सहकार्यमा धुलिखेलमा ब्यवसायीक उडान सुरु गर्न लागेका हुन् ।
संचालक दावा लामाका अनुसार एकै पटकमा ६ वटा उडान भर्न सकिने छ । उडान भर्ने यात्रुले ३० मिनेट अवधिको ७ हजार रुपैयाँ तिर्नु पर्नेछ । ७ हजार रुपैयामा ३७ लाख रुपैयाको दुर्घटना विमा हुनेछ ।
धुलिखेल पछिल्लो समय आन्तरिक तथा बाह्य पर्यटकहरुका लागि आर्कषक बन्दै गएको छ । धुलिखेलमा निर्माण भएका देविस्थान पार्क, बलभद्र कुँवर स्मारक, हजार सिँढी तथा अन्य पार्कहरुले धुलिखेलमा घुम्न आउने र बनभोजका लागि आउने आन्तरिक पर्यटकहरुको घुँईचो लाग्न थालेको छ ।
