काठमाडौं । सरकारले शनिबारबाहेकका अधिकांश सार्वजनिक विदाका दिन सेवाग्राहीको चाप हुने सरकारी कार्यालय खुला राख्ने निर्णय गरेको छ ।
सरकारले सेवाग्राहीको चाप हुने सरकारी निकाय दशैं, तिहार, छठ जस्ता ठूला चाडबाहेकका जात्रा, पर्व, दिवस, जयन्तीजस्ता सार्वजनिक विदामा खुला राख्ने निर्णय गरेको हो
आगामी वर्षको बिदा पुनरावलोकन गर्ने क्रममा मन्त्रिपरिषदको प्रशासन समितिमा केही सचिवहरुले अत्यधिक बिदा भएकाले कटौतीको अवधारणामा जानुपर्छ भन्ने सुझाव दिएका थिए ।
समावेशी र सहभागिमूलक अवधारणाको प्रतिकुल हुने गरी कुनै चाडबाडमा विदा दिने र कुनैमा नदिने गर्न नहुने भएकाले निश्चित बिदामा कार्यालय सञ्चालन गर्ने अवधारणा अघि सारिएको हो ।
सोहहि अनुरुप २३ वटा सार्वजनिक बिदाका दिन सेवाग्राहीको अत्यधिक चाप हुने निकाय तथा कार्यालयमा सेवा दिने तयारी भएको छ । यसका लागि सार्वजनिक विदाका दिन खुला हुने सरकारी कार्यालय र त्यहाँबाट प्रवाह हुने सेवा तोक्ने तयारी छ ।
गृहमन्त्रालय र प्रधानमन्त्री तथा मन्त्रिपरिषदको कार्यदलले कुनकुन बिदाको दिन कुन कुन कार्यालय खुल्ने भन्ने खाका तयार गरेको छ ।
वर्षका ५२ वटा शनिबारका दिन भने सरकारी कार्यालय खुल्दैनन् । कुल जनसंख्याको करिब ३÷४ प्रतिशतभन्दा कम संख्या रहेका समुदायको चाडबाड, जात्रा जात्रा, पर्व, जयन्ती जस्ता प्रकृतिका सार्वजनिक विदामा भने कार्यालयहरु खुल्नेछन् ।
बुद्धजयन्ती, जनैपूर्णिमा, कृष्ण जन्माष्टमी, घटस्थापना, उधौली, उभौली, क्रिसमस, तमु ल्होसार, माघे संक्रान्ति, सोनाम ल्होसार, शिवरात्री, ग्याल्पो ल्होसार, बकर इद, इदुल फित्र र फागु पूर्णिमाका दिन कार्यालय खोल्ने तयारी छ । यस्तै नयाँवर्ष, गणतन्त्र दिवस, मे दिवस, संविधान दिवस, प्रजातन्त्र दिवस, महिला दिवस, पृथ्वी जयन्ती र जनयुद्ध दिवसका दिन पनि कार्यालय खोल्ने प्रस्ताव छ ।
उक्त दिनमा जिल्ला प्रशासन कार्यालय, अध्यागमन विभाग, कन्सुलर विभाग, आन्तरिक राजस्व विभाग र मातहतका कार्यालय, भन्सार विभाग र मातहतका कार्यालय, कम्पनी रजिष्ट्रारको कार्यालय, बैदेशिक रोजगार विभाग, यातायात व्यवस्था कार्यालयहरु, सरकारी अस्पताल, खानेपानी, विद्युत र दुरसञ्चार महशुल लिने कार्यालय खुला गरेर सेवा दिने खाका बनेको छ ।
सार्वजनिक विदाका दिन खोल्ने कार्यालयहरुमा नियमित दिनमा जस्तो सबै सेवा भने खुल्दैनन् ।
बिदामा कार्यालय खोल्दा जिल्ला प्रशासन कार्यालयले नागरिकताको प्रमाणपत्र, राष्ट्रिय परिचयपत्र र राहदानीको सेवा मात्रै दिने छ । प्रशासन कार्यालयका अरु सेवा भने त्यस दिन बन्द रहनेछन् ।
यस्तो दिन कार्यालय आएर काम गर्ने कर्मचारीहरुले भत्ता पाउँदैनन्, बरु अर्को दिन सट्टा बिदा पाउनेछन् ।
सरकारी कार्यालय मात्रै खुलेर पूर्ण रुपमा सेवा लिन नसकिने अवस्थामा त्योसँग सम्बन्धित अन्य सेवा र सुविधा नियमित गर्ने नीतिगत निर्णय भएको प्रधानमन्त्री तथा मन्त्रिपरिषद कार्यालयले तयार पारेको खाकामा उल्लेख छ ।
कर, राजस्व र महशुल बुझाउनुपर्ने भएकाले सम्बन्धित कार्यालयमा रहेका बैंकका शाखा खुलाउन नेपाल राष्ट्र बैंकमार्फत निर्देशन दिने निर्णय भएको छ ।
मेडिकल कलेज र पब्लिक अस्पतालहरु के गर्ने भन्ने टुंगो लागिसकेको छैन । विद्यालयदेखि विश्वविद्यालयसम्म शैक्षिक संस्थाहरुको आफ्नै क्यालेण्डर हुने भएकाले उनीहरुको बिदामा हस्तक्षेप नगर्ने तयारी छ ।
