काठमाडाैं । प्रदेश १ को फागुन १७ गते बसेको प्रदेश सभा बैठकले प्रदेशको नाम कोशी प्रदेश राख्न सफल भएको छ ।
कोशी प्रदेश नामाकरणको प्रस्ताव नेकपा एमाले र नेपाली कांग्रेसले ल्याएको थियो । एमाले सांसद रामबहादुर राना प्रस्तावक, एमालेकै निरन राई र कांग्रेसका भूमिप्रसाद राजवंशी समर्थक रहेर दर्ता भएको प्रस्तावको पक्षमा ८२ मत परेसँगै प्रदेशको नामकरण भएको हो ।
विपक्षमा एकीकृत समाजवादीका चार सांसदको मात्रै मत परेको छ भने जनता समाजवादी पार्टी ९जसपा० का एक्ला सांसद बैठक कक्ष बाहिर परेका कारण मतदानमा भाग लिनै पाइनन् । एकीकृत समाजवादी र जसपाका तर्फबाट पूर्वमुख्यमन्त्री राजेन्द्र राईले पहिचान र भूगोल समेटेर ‘किराँत–लिम्बुवान–सगरमाथा’ नाम प्रस्ताव गरेका थिए ।
प्रदेश नं १ को नामाकरण गरेको अवसरमा प्रदेश सरकारले आज कोशी प्रदेशभरी सार्वजनिक बिदा दिने निर्णय गरेको छ । आन्तरिक मामिला तथा कानुन मन्त्रालयले सूचना प्रकाशन गरी फागुन १८ गते बिहिबार प्रदेशभरी सार्वजनिक बिदा दिने निर्णय भएको जनाएको छ ।
