नेपाल टेलिकमले हालै जारी गरेको रु. ४ हजार ९९९ बराबरको ३० एमबीपीएस इन्टरनेट प्याकेजका सम्बन्धमा केही सञ्चारमाध्यममा तथ्यभन्दा फरक रूपमा समाचार प्रकाशित तथा प्रसारित भइरहेको भन्दै कम्पनीले गम्भीर ध्यानाकर्षण भएको जनाएको छ ।
नेपाल दूरसञ्चार प्राधिकरण, जमल, काठमाडौंको मिति २०८३।०६।३० को इन्टरनेट सेवा प्रदायकहरूले प्राप्त गरेको अनुमति पत्रको सर्तविपरीत काम गरेको भन्ने सम्बन्धमा जारी प्रेस विज्ञप्तिलाई आधार मानी उक्त भ्रमपूर्ण समाचार सम्प्रेषण भएको पाइएको कम्पनीले जनाएको छ ।
नेपाल टेलिकमले विगतदेखि निरन्तर रूपमा सञ्चालन गर्दै आएका प्याकेजहरूको स्वीकृतिका लागि नेपाल दूरसञ्चार प्राधिकरणलाई पत्राचार गर्दै आएको जनाएको छ । कम्पनीका अनुसार मिति २०८३।०६।३० मा अफरको रूपमा सञ्चालनमा ल्याइएको प्याकेजका सम्बन्धमा नेपाल दूरसञ्चार प्राधिकरणलाई जानकारी गराइसकिएको छ । उक्त प्याकेज कम्पनीले विद्यार्थी अफरको रूपमा यसअघि नै प्राधिकरणलाई जानकारी गराई सञ्चालनमा ल्याएको अफरसमेत हो ।
अतः विभिन्न सञ्चारमाध्यममा आएका ३० एमबीपीएसको एफटीटीएच प्याकेज, रु. ४ हजार ९९९ बराबरको सस्तो प्याकेजको स्वीकृति र सञ्चालनका विषयमा कुनै भ्रममा नपर्न कम्पनीले सम्बन्धित सबैमा अनुरोध गरेको छ ।
नेपाल टेलिकमले नेपाल सरकारको स्वीकृत नीति एवं कानुनको परिधिभित्र रही कार्य गरिरहेको र कानुन पालना गर्न सधैँ प्रतिबद्ध रहेको समेत जानकारी गराएको छ ।
