असोज ७, काठमाडौं । आगामी असोज ७ देखि ११ गतेसम्म देशका विभिन्न भागमा उल्लेख्य वर्षा हुने पूर्वानुमान गरिएको छ । मौसम पूर्वानुमान मोडलको औसतमा आधारित प्रक्षेपणअनुसार विशेषगरी गण्डकी र लुम्बिनी प्रदेशका पहाडी तथा मध्यपहाडी जिल्लामा बढी वर्षा हुने देखिएको छ।
पूर्वानुमानअनुसार पाँच दिनको अवधिमा सबैभन्दा बढी वर्षा पाल्पामा २८५ मिलिमिटर हुने प्रक्षेपण गरिएको छ। त्यस्तै कास्कीमा २७८, पर्वतमा २७१, अर्घाखाँचीमा २६१, म्याग्दीमा २६०, नवलपरासी पूर्व र पश्चिममा २५७–२५७, लमजुङमा २५६, रुपन्देहीमा २५५ तथा मनाङमा २५० मिलिमिटरसम्म वर्षा हुन सम्भावना रहेको छ ।
पुर्वानुमान अनुसार मध्य तथा पश्चिम नेपालका केही जिल्लामा २०० मिलिमिटरभन्दा बढी वर्षा हुने सम्भावना देखिएको छ । काठमाडौं उपत्यका आसपासका जिल्लासहित मध्य नेपालका केही क्षेत्रमा पनि उल्लेख्य वर्षाको प्रक्षेपण गरिएको छ ।
यस अवधिमा निरन्तर वा भारी वर्षा भएमा बाढी, पहिरो, डुबान तथा सडक यातायातमा अवरोधको जोखिम बढ्न सक्ने भएकाले विशेषगरी पहाडी तथा नदी किनारका बस्तीमा सतर्कता आवश्यक देखिन्छ।
