- खगेन्द्र फुयाल
साउन २२, काठमाडौं । फ्रान्सेली दार्शनिक तथा नाटककार झाँ–पल सार्त्रको प्रसिद्ध नाटक ल पुट्याँ रेस्पेक्ट्युस को नेपाली रूपान्तरण ‘एक संवेदनशील यौनकर्मी’ शिल्पी थिएटर, बत्तीसपुतलीमा मञ्चन भइरहेको छ।
नाटककी मुख्य पात्र मेनुका, एक यौनकर्मी हुन्। बस यात्राका क्रममा उनी एउटा जघन्य घटनाको प्रत्यक्षदर्शी बन्छिन्। वास्तविक अपराधीलाई जोगाउन प्रभावशाली व्यक्तिहरूले आफ्नो शक्ति र प्रतिष्ठाको दुरुपयोग गर्दै निर्दोष व्यक्तिमाथि झूटो आरोप लगाउने प्रयास गर्छन्। घटनामा एक जनाको ज्यान जान्छ भने निर्दोष व्यक्ति अन्यायको शिकार बन्छ। प्रहरीसमेत प्रभावशाली पक्षकै पक्षमा उभिएर मेनुकामाथि झूटो बयान दिन दबाब सिर्जना गर्छ। त्यसपछि आफ्नो ज्यान जोगाउन संघर्षरत निर्दोष व्यक्ति मेनुकासँग सहयोगको अपेक्षा गर्दै पुग्छ।
यो नाटक फ्रान्सेली नाटककार झाँ–पल सार्त्रको ल पुट्याँ रेस्पेक्ट्युस को नेपाली रूपान्तरण हो। यसको नेपाली रूपान्तरण कल्पना घिमिरे नुरिस्यौंले गर्नुभएको हो भने निर्देशन पवित्रा खड्काले गर्नुभएको छ।
नाटकले पछिल्लो समय समाजमा देखिएका साम्प्रदायिक विभेद, सांस्कृतिक असमानता, लैङ्गिक विभेद, राजनीतिक भ्रष्टाचार तथा शक्तिको दुरुपयोगका कारण गरिब, कमजोर र असहाय नागरिकमाथि हुने अन्यायलाई सशक्त रूपमा प्रस्तुत गरेको छ। न्याय प्रणालीमाथि शक्तिशालीको प्रभाव र त्यसले निम्त्याउने सामाजिक विसंगतिलाई नाटकले मार्मिक ढंगले उजागर गर्छ।
नाटक साउन १३ गतेदेखि भदौ ६ गतेसम्म शिल्पी थिएटर, बत्तीसपुतलीमा मञ्चन भइरहेको छ। प्रदर्शन प्रत्येक दिन साँझ ५:१५ बजेदेखि ७:०० बजेसम्म हुनेछ भने प्रत्येक शनिबार दिउँसो १:०० बजे अतिरिक्त प्रदर्शन पनि गरिनेछ। मंगलबार भने नाटकघर बन्द रहनेछ। नाटकको प्रवेश शुल्क ५ सय रुपियाँ रहेकाे छ।
