काठमाडौँ, साउन ८ — आगामी नेपाल भलिबल लिग (NVL) को तयारीमा जुटेको फ्रेन्चाइज टोली कर्णाली शिवराजले आज एक विशेष समारोहका बिच आफ्ना आधिकारिक ब्रान्ड एम्बासडर, टोलीका विशेष प्रतिनिधि व्यक्तित्वहरू र थिम सङ्ग (Theme Song) सार्वजनिक गरेको छ।
टोलीले नेपाली चलचित्र क्षेत्रका महानायक राजेश हमाललाई आफ्नो ‘Official Brand Ambassador’ का रूपमा घोषणा गरेको छ। हमालको व्यक्तित्व, उच्च नेतृत्व क्षमता र प्रेरणाले कर्णाली शिवराजको अभियानलाई राष्ट्रिय तथा अन्तर्राष्ट्रिय स्तरमा अझ सशक्त र उँचो बनाउने विश्वास टोलीले लिएको छ।
यसैगरी, खेलकुद क्षेत्रका चर्चित व्यक्तित्वहरूलाई पनि टोलीले विभिन्न विशेष जिम्मेवारी र सम्मानसहित जोडेको छ:
- Face of Karnali: व्यावसायिक मिश्रित मार्शल आर्ट्स (MMA) फाइटर ‘बझाङ्गी बाघ’ रविन्द्र ढाँट। उहाँको खेलप्रतिको समर्पण, अनुशासन र कर्णालीप्रतिको आत्मीय सम्बन्धका कारण टोलीको प्रेरणादायी अनुहारका रूपमा चयन गरिएको हो।
- Glory of Karnali: नेपाली राष्ट्रिय महिला भलिबल टोलीकी उत्कृष्ट सदस्य सुमित्रा रेग्मी। नेपाली भलिबलमा उहाँले पुर्याउनुभएको योगदान र कर्णालीको शानलाई सम्मान गर्दै यो उपाधि प्रदान गरिएको हो।
- Queens of Karnali: कर्णाली प्रदेशमा जन्मिएर नेपाली भलिबलमा विशिष्ट पहिचान बनाउन सफल राष्ट्रिय खेलाडीद्वय प्रगति नाथ र कामना बिष्ट। उहाँहरूलाई कर्णालीको प्रतिभा, साहस र सम्भावनाका सशक्त प्रतीकका रूपमा सार्वजनिक गरिएको छ।
कार्यक्रमका बिच कर्णाली शिवराजले आफ्नो नयाँ र ऊर्जावान् आधिकारिक थिम सङ्ग (Theme Song) समेत सार्वजनिक गरेको छ, जसले टोलीको जोश र कर्णालीको पहिचानलाई समेटेको छ।
समारोहमा कर्णाली शिवराज परिवारका तर्फबाट अभियानमा सहयोग पुर्याउने सम्पूर्ण शुभचिन्तक, समर्थक, साझेदार संस्था तथा सञ्चारमाध्यमप्रति हार्दिक आभार व्यक्त गरियो। साथै, आगामी नेपाल भलिबल लिगमा कर्णालीको गौरव, सांस्कृतिक पहिचान र खेलप्रतिको समर्पणलाई अझ नयाँ उचाइमा पुर्याउने दृढ प्रतिबद्धता समेत टोलीले जनाएको छ।
