काठमाडौं । विश्वकै नम्बर एक इलेक्ट्रिक दुईपाङ्ग्रे ब्रान्ड याडियाले आफ्नो बहुप्रतीक्षित प्रिमियम इलेक्ट्रिक मोटरसाइकल ‘याडिया किनिस’ नेपाली बजारमा आधिकारिक रूपमा सार्वजनिक गरेको छ।
नेपालका लागि याडियाको आधिकारिक विक्रेता कुजु नेपाल प्रालिले एक कार्यक्रमको आयोजना गरी यो नयाँ मोटरसाइकल नेपाली बजारमा प्रस्तुत गरेको हो। दैनिक आवतजावतलाई मात्र केन्द्रित गर्ने परम्परागत इलेक्ट्रिक दुईपाङ्ग्रे सवारीसाधन भन्दा फरक यस याडिया किनिसलाई उच्च गति, प्रदर्शन, रोमाञ्चक राइडिङ अनुभव र आकर्षक डिजाइनलाई प्राथमिकतामा राखेर विकास गरिएको कम्पनीले जनाएको छ। आधुनिक प्रविधि, शक्तिशाली प्रदर्शन र प्रिमियम अनुभव खोज्ने नेपाली राइडरहरूलाई लक्षित गर्दै बजारमा ल्याइएको यो मोटरसाइकलले नेपालको ईभी बजारमा नयाँ अनुभव प्रस्तुत गर्ने अपेक्षा कम्पनीले राखेको छ ।
प्राविधिक विशेषताका हिसाबले याडिया किनिसमा ११ किलोवाट क्षमताको उच्च प्रदर्शनयुक्त मिड–ड्राइभ मोटर जडान गरिएको छ, जसले २८० एनएम टर्क उत्पादन गर्छ। यसले तीव्र एक्सिलेरेसन र उत्कृष्ट सडक प्रदर्शन सुनिश्चित गर्दछ। यो मोटरसाइकलले मात्र ३ सेकेन्डमा शून्यदेखि ५० किलोमिटर प्रतिघन्टाको गति समात्न सक्छ भने यसको अधिकतम गति १०० किलोमिटर प्रतिघन्टा रहेको छ।
नेपालका फरकफरक सडक र उकालो बाटोलाई ध्यानमा राखेर बनाइएको किनिसले २० डिग्रीसम्मको चढाइ सहजै पार गर्न सक्छ, जसले कठिन सडकमा पनि सहज र भरपर्दो राइडिङ अनुभव प्रदान गर्दछ। यसमा ४ दशमलव ६ किलोवाट प्रतिघण्टा क्षमताको ब्याट्री प्रयोग गरिएको छ, जसलाई ४० भन्दा बढी सुरक्षा सुविधाहरूसहितको स्मार्ट ब्याट्री व्यवस्थापन प्रणालीले सुरक्षित र भरपर्दो बनाएको छ।
यो प्रणालीले ब्याट्रीलाई सुरक्षित, भरपर्दो र लामो समयसम्म टिकाउ बनाउँदै सहज र विश्वसनीय यात्रा सुनिश्चित गर्दछ। अन्तर्राष्ट्रिय स्तरमा प्रतिष्ठित ‘रेड डट डिजाइन अवार्ड’ समेत प्राप्त गरिसकेको यो मोटरसाइकलले याडियाको उत्कृष्ट डिजाइन र आधुनिक विद्युतीय प्रविधिप्रतिको प्रतिबद्धतालाई दर्शाउँछ। नेपाली बजारमा यसको अधिकतम खुद्रा मूल्य ६ लाख ६० हजार रुपैयाँ तोकिएको छ।
कार्यक्रमका अवसरमा कुजु नेपाल प्रालिका प्रतिनिधिले याडिया किनिस केवल यातायातको साधन मात्र नभएर शक्ति, प्रदर्शन र रोमाञ्चको अनुभव भएको बताए। उनले यो कार्यक्रमले नेपालमा इलेक्ट्रिक मोटरसाइकललाई हेर्ने दृष्टिकोणमा सकारात्मक परिवर्तन ल्याउने आशावादी रहेको समेत उल्लेख गरे। सन् २००१ मा स्थापना भएको याडिया लगातार ९ वर्षदेखि विश्वकै नम्बर एक इलेक्ट्रिक दुईपाङ्ग्रे ब्रान्ड बन्न सफल भएको छ। हाल विश्वभरका १५० भन्दा बढी देशमा सक्रिय रहेको र १० करोडभन्दा बढी प्रयोगकर्ताको विश्वास जितिसकेको याडियाले नेपालको प्रिमियम ईभी बजारमा आफ्नो उपस्थितिलाई अझ बलियो बनाउने लक्ष्य राखेको कम्पनीले जनाएको छ ।
