मङ्सिर १३, काठमाडौं । पत्रकार दिपेन्द्र शर्माद्वारा लिखित पुस्तक ‘युद्ध पत्रकारिता’ लोकार्पण गरिएको छ ।
शुक्रबार आयोजित कार्यक्रममा राष्ट्रिय सभाका अध्यक्ष नारायण प्रसाद दाहालको प्रमुख आतिथ्यतामा पुस्तक लोकार्पण गरिएको हो ।
पुस्तकमाथि समीक्षा गर्दै अध्यक्ष दाहालले पुस्तकले जनयुद्धमा जनपत्रकारहरूले खेलेको भूमिका साहसिक र अतुलनीय रहेको बताए । आफूले पनि जनयुद्धमा पत्रकारिता गरेको स्मरण गर्दै दाहालले भने,“बन्दुक र कलमको समायोजन, लडाइँ र पढाइको फ्युजन, बारुद र मसीको घोलको सम्मिश्रण आजको गणतन्त्र हो ।”
नेपाल पत्रकार महासंघकी अध्यक्ष निर्मला शर्मा र प्रेस सेन्टर नेपालका संस्थापक अध्यक्ष एवं वरिष्ठ पत्रकार महेश्वर दाहालले पुस्तकमाथि टिपंणी गरेका थिए ।
जाजरकोटका पत्रकार शर्माले माओवादी जनयुद्धका बेला पार्टी निकट रही पत्रकारिता गर्दाको अनुभव सहित मिसन पत्रकारिता, भूमिगत सञ्चार, वैचारिक सङ्घर्ष र जनयुद्धका गतिविधिलाई समेटेका छन् ।
