काठमाडौं । स्वतन्त्र ऊर्जा उत्पादकहरूको संस्था (इप्पान) ले सेयर निष्काशनमा भएको लामो ढिलाइप्रति कडा असन्तुष्टि जनाउँदै सरकारले माग नसुने १५ दिनभित्र आन्दोलनको चेतावनी दिएको छ ।
बुधबार आयोजित पत्रकार सम्मेलनमा इप्पानले पछिल्लो २८ महिनादेखि आईपीओ तथा राइट सेयर निष्काशन रोकिनुका कारण निजी लगानीकर्ता निरुत्साहित हुनुका साथै आयोजनामा स्थानीय अवरोध बढेको स्पष्ट पारेको छ ।
इप्पानका अनुसार हाल ५० जलविद्युत् कम्पनी २३ अर्बभन्दा बढीको सेयर निष्काशन अनुमति कुरिरहेका छन् । तर, धितोपत्र बोर्डको ‘रियल नेटवर्थ’ जस्ता अवैधानिक आधारले सेयर निष्काशन रोकिँदा लगानीकर्तालाई झण्डै १ खर्ब ८ अर्ब रुपैयाँ बराबरको क्षति पुगेको जनाएको छ ।
इप्पानले समयमै सेयर निष्काशन नहुँदा केही समूहले कानुनविपरीत १० प्रतिशत नि:शुल्क सेयर माग गर्दै आयोजना अवरुद्ध गर्न थालेको आरोप लगाएको छ ।
४५ मेगावाटको भोटेकोशी आयोजनामा एक महिनाभन्दा बढी उत्पादन बन्द हुनु, ३२ करोडको क्षति हुनु त्यसको उदाहरण भएको इप्पानको भनाइ छ । इप्पानले नि:शुल्क सेयर दिन असम्भव रहेको र कानुनी व्यवस्था अनुसार मात्र स्थानीयलाई १० प्रतिशत सेयर दिने स्पष्ट पारेको छ ।
सरकारलाई इप्पानले मुख्य पाँच वटा माग अघि सारेको छ । सेयर निष्काशन तत्काल खुलाउने निर्देशन दिन, धितोपत्र बोर्डको अध्यक्षविरुद्ध मुद्दा दायर, १ खर्ब ८ अर्ब बराबरको क्षतिपूर्ति माग गर्दै अख्तियारमा उजुरी, आयोजनाको सुरक्षार्थ विशेष सुरक्षा दस्ता गठन र . माग १५ दिनमै सम्बोधन नभए भर्चुअल र सडक आन्दोलन गर्ने विज्ञप्तिमा उल्लेख छ ।
इप्पानले ऊर्जा क्षेत्रमा करिब १५ खर्ब लगानी भइसकेको र आगामी ३० खर्ब लगानी जोखिममा पर्ने भन्दै सरकारलाई गम्भीर निर्णय लिन आग्रह गरेको छ ।
