काठमाडौं। हालै देशव्यापी रूपमा भएको आन्दोलन र प्रदर्शनले अटोमोबाइल क्षेत्रमा प्रत्यक्ष र गहिरो असर पारेको नाडा अटोमोबाइल्स एशोसिएसन अफ नेपालले जनाएको छ।
देशको उद्योग, व्यापार र रोजगारीको महत्वपूर्ण आधारस्तम्भ मानिने अटोमोबाइल क्षेत्र कर्मचारी, ग्राहक र सम्पूर्ण संरचनाको सुरक्षाको दृष्टिकोणबाट समेत चिन्ताजनक अवस्थामा पुगेको उल्लेख गर्दै, नाडाले यस अवस्थाप्रति गम्भीर ध्यानाकर्षण गराएको हाे।
यस्तै नाडाले व्यवसायिक समुदायको सुरक्षालाई सर्वोच्च प्राथमिकता दिइनुपर्ने र अटोमोबाइल क्षेत्रलाई यथाशीघ्र सामान्य अवस्थामा फर्काउन आवश्यक सहजीकरण गर्न सरकारलाई आह्वान समेत गरेको छ ।
नाडाले आफ्ना सदस्य कम्पनीहरू, उपभोक्ताहरू र समग्र अटोमोबाइल उद्योगको हितमा निरन्तर क्रियाशील रहने प्रतिबद्धता व्यक्त गर्दै, जिम्मेवार नेतृत्व, सकारात्मक संवाद र एकताबद्ध प्रयासबाट मुलुक छिट्टै स्थायित्वतर्फ अघि बढ्ने विश्वास व्यक्त गरेको छ।
हालको अस्थिर परिस्थितिले उपभोक्ताको विश्वासमा नकारात्मक असर पारेको भन्दै नाडाले यसको दीर्घकालीन प्रभाव लगानी र रोजगारीमा पनि पर्न सक्ने तर्फ सचेत गराएकाे छ। यस्तो अवस्थामा, सबै पक्षबीच संवाद र सहमतिको माध्यमबाट समाधान खोज्नुपर्ने नाडाको आग्रह छ।
यस्तै नाडाले आन्दोलनका क्रममा ज्यान गुमाएका नागरिकप्रति गहिरो श्रद्धाञ्जली अर्पण गर्दै, प्रभावित सम्पूर्ण परिवारप्रति समवेदना प्रकट गरेको छ भने घाइते भएकाहरूको शीघ्र स्वास्थ्य लाभको कामना गर्दै मुलुकमा पुनः शान्ति र स्थायित्व फर्कोस् भन्ने शुभेच्छा समेत व्यक्त गरेको छ।
यसैबीच, देशको इतिहासमै पहिलोपटक महिला प्रधानमन्त्री चयन भएको सन्दर्भमा पनि नाडाले शुभकामना प्रकट गरेको छ।
