सिन्धुली । सिन्धुलीमाढीस्थित गौमती माध्यामिक विद्यालयका दुईजना शिक्षकले रिले अनसन सुरु गरेका छन् ।
सहायक प्रधानाध्यापक शंकर प्रसाद ढकाल र शिक्षक विष्णुप्रसाद फुयालले आफुहरुलाई नगरपालिकाले प्रतिशोध साधेर सरुवा गरेको भन्दै रिले अनसनमा बसेका हुन ।
शिक्षक ढकाल र फुयालले विद्यालय व्यवस्थापन समितिले विद्यालयमा गरेका राजनीतिक हस्तक्षेप र बेथितीका सवालमा आवाज उठाउँदै आएका थिए ।
विद्यालय व्यवस्थापन समितिका अध्यक्ष तथा नेकपा एमाले सिन्धुलीका उपाध्यक्ष कर्ण घिसिङले विद्यालयमा नियुक्ति तथा छात्रावृत्ति वितरणमा हस्तक्षेप गरी एकपक्षीय रुपमा दिएको भन्दै विरोध भएको थियो ।
विद्यालयको विकास र शैक्षिक गुणस्तरका लागि निरन्तर क्रियाशिल रहिरहेको अवस्थामा कुनै पूर्व सूचना विना प्रतिशोधपूर्ण सरुवा गरिएको निर्णयको विरोधमा विद्यालयको प्राङ्गणमा नै रिले अनसन बसेको शिक्षक विष्ण फुयाले बताए । नगर शिक्षा समितिको पदेन सदस्य नेपाल शिक्षक महासंघका नगर अध्यक्ष रहने भए पनि बैठकमा कुनै खबर नगरी शिक्षक सरुवाको निर्णय गरिएको उनको भनाई छ ।
शिक्षक ढकाल विगत ३५ वर्ष देखि गौमती माविमा निमावि शिक्षकको दरबन्दीमा रहि कक्षा १२ सम्म गणित विषय अध्यापन गराउनुहुन्छ । ढकालले सिभिल इन्जिनियरिङ संयोजक, कक्षा ११ र १२ को संयोजकको जिम्मेवारी र सहायक प्रधानाध्यापकको जिम्मेवारी सम्हाल्नुभएको छ ।
विगत लामो समय देखि विद्यालय व्यवस्थापन समितिमा राजनीतिक हस्तक्षेपमा गैर अभिभावक हुने र विद्यालय प्रशासनसँगको मिलेमतमा विद्यालयको हीत विपरित कार्यहरु भएको निर्णय विरुद्ध आवाज उठाउँदै आएका थिए ।
ढकालको नेतृत्वमा वृहत्तर शैक्षिक विकासका लागि एक करोड रुपैयाँको शैक्षिक विकास कोष स्थापनाको लागि सहयोग संकलन अभियान सञ्चालन भैरहेको छ । हाल उक्त कोषमा ९ लाख रकम संकलन भईसकेको छ ।
त्यस्तै शिक्षक फुयाल विगत ११ वर्ष देखि निमावि दरबन्दीमा रहि कक्षा १२ सम्म शिक्षण गर्दै आईरहनु भएको छ । फरक राजनीतिक आस्थालाई समर्थन गर्ने भएका कारण नै विद्यालय व्यवस्थापन समितिबाट पटक पटक असहिष्णु व्यवहार हुँदै आएको जनाइएको छ ।
अनसनका मागहरु यस्ता रहेका छन्
२०८२ साउन १६ गते कमलामाई नगरपालिका शिक्षा समितिको बैठकबाट माविका शिक्षकलाइ प्रतिशोध साध्न गरिएको सरुवा वदर गर्नुपर्ने ।
विद्यालयमा चलिरहेको बेथिति अन्त्य गर्नुपर्ने ।
विद्यालय व्यवस्थापन समितिबाट विद्यालयका शिक्षक कर्मचारीलाई डर त्रास धम्कि दिने काम बन्द गरी शैक्षिक वातारवण कायम गर्नुपर्ने ।
