काठमाडौँ । आगामी सेप्टेम्बरदेखि बुद्ध एयरले काठमाण्डौ र कलकत्ताबीचको सीधा उडान सेवा पुनः सुरु गर्ने भएको छ ।
करिब पाँच वर्षपछि यो रूटमा हवाइ सम्पर्क पुनः सुचारु भएपछि नेपालको पर्यटन, व्यापार र शिक्षा क्षेत्रका लागि ठूलो राहत पुग्ने आशा गरिएको छ ।
साथै, नेपाल–भारत सम्बन्ध सुदृढ बनाउन यो एक ऐतिहासिक अवसर पनि भएको बुद्धका अधिकारीहरुले बताएका छन् ।
सन् १९९७ मा प्रसिद्ध एभरेस्ट एक्स्पेरियन्स उडानबाट आफ्नो यात्रा सुरु गरेको बुद्ध एयरले हाल नेपालको हवाई बजारमा ६५ प्रतिशत हिस्सा ओगटेको छ ।
बुद्धले हालसम्म भारतको वाराणसीलगायत १५ वटा गन्तव्यमा सेवा विस्तार गरिसकेको छ ।
कोभिड–१९ महामारी र यात्रु मागमा आएको गिरावटका कारण काठमाण्डौ–कलकत्ता मार्ग अस्थायी रूपमा बन्द गरिएको थियो।
तर, पछिल्लो समय यात्रुहरूमा बढ्दो चासो, क्षेत्रीय कनेक्टिभिटीको पुनरागमन र द्विपक्षीय सहकार्यले गर्दा यो मार्ग पुनः सुरु गर्न उपयुक्त समय आएको कम्पनीले जनाएको छ।
छोटो, सहज र प्रभावकारी यात्रा
सिधा हवाई सेवाको पुनः सञ्चालनले पट्यारलाग्दो र थकानयुक्त यात्रालाई छोटो, सहज र आरामदायक बनाउने कम्पनीको विश्वास छ ।
यो मार्गमा यात्रा गर्न केवल ९० मिनेट लाग्नेछ, जुन समयावधि यात्रुहरूका लागि निकै रोचक र छरितो हुनेछ। विशेषगरी छोटो यात्रा, सप्ताहन्त भ्रमण वा हप्तादिनको अवकाश योजना बनाइरहेका परिवारका लागि यस सुविधाले आकर्षक अवसरमा बदल्न सक्छ ।
पर्यटन क्षेत्रको नयाँ सम्भावना
नेपाल र भारतबीच गहिरो सांस्कृतिक, धार्मिक एवम् ऐतिहासिक सम्बन्ध रहँदै आएको छ।
सन्त, साधु, तीर्थयात्री र पर्यटकहरू सदियौँदेखि यी दुई मुलुकबीच आवागमन गर्दै आएका छन्। यो मार्ग पुनः खुलेसँगै तीर्थालुका लागि पशुपतिनाथ, बौद्धनाथ, स्वयम्भूनाथदेखि दक्षिणेश्वरी, कालीघाट र बेलूर मठसम्मको यात्रा सहज बन्ने कम्पनीको विश्वास छ ।
काठमाण्डांै र कलकत्ता दुवै शहर युनेस्को विश्व सम्पदा सूचीमा सूचीकृत स्थलहरू हुन् । पवित्र मन्दिरहरू, मस्जिदहरू, औपनिवेशिक इतिहास र जीवन्त सांस्कृतिक धरोहरहरूको धनी केन्द्र हो–कलकत्ता ।
यस्तो विरासत र विविधताले पर्यटकहरूलाई दक्षिण एशियाली इतिहास र आतिथ्यको वास्तविक अनुभव प्रदान गर्नेछ।
विद्यार्थी र युवाका लागि सुवर्ण अवसर
उडानको सहज पहूँचले विद्यार्थी तथा युवा यात्रुहरूका लागि पनि अवसरको ढोका खोल्ने विस्वास बुद्ध एयरको छ । किफायती भाडामा यात्रा गर्न सकिने भएकाले धेरै विद्यार्थीहरू शैक्षिक भ्रमण, अध्ययनसँग सम्बन्धित भेटघाट तथा अन्तरसंस्कृतिक अनुभवका लागि दुवै शहरमा ओहोर–दोहोर गर्न यसबाट थप सहज हुनेछ ।
साथै, नेपाल र भारतका विश्वविद्यालय र शैक्षिक संस्थाहरूबीच सहकार्यको सम्भावना बढ्नेछ भने विद्यार्थी आदानप्रदान कार्यक्रम, सह–शोध, कार्यशाला तथा परियोजनाहरूले दुवै देशको शैक्षिक क्षितिज फराकिलो बनाउनेछन् ।
व्यापार र लगानीमा नयाँ गति
काठमाण्डौ–कलकत्ता उडानको पुनः सञ्चालन व्यापार तथा लगानीका लागि ठूलो सम्भावना बोकेको छ । कलकत्ता भारतको पूर्वी वाणिज्य केन्द्र हो भने काठमाण्डौँ नेपालको राजनीतिक, प्रशासनिक तथा आर्थिक राजधानी हो।
अझ सामुद्रिक ब्यापारमा नेपालको सबैभन्दा ठूलो निर्भरता नै कलकत्तासँग छ । कुनै बेला सिंगो भारतकै राजधानी रहेको यो प्राचीन शहरसँग नेपालको जनस्तरको सम्बन्ध छ ।
यी दुई शहरबीचको छिटो सम्पर्कले व्यापारिक भेटघाट, लगानीका अवसरहरूको खोजी, तथा आपूर्ति श्रृङ्खला व्यवस्थापनमा नयाँ गति प्रदान गर्ने छ ।
व्यवसायीहरू अब थोरै समयमा दुबै देशबीच यात्रा गरेर समय, श्रम र लागतको बचत गर्न सक्नेछन्। यसले साना र मझौला उद्यमहरूलाई समेत सहजता प्रदान गर्नेछ ।
यो उडान पुनः सुरु हुनु केवल एक विमान सेवा मात्र होइन, दुई देशबीचको ऐतिहासिक सम्बन्धलाई पुनः उजागर गर्ने अवसर हो । धार्मिक यात्रा होस् वा सांस्कृतिक चाडपर्व, विद्यार्थी होस् वा व्यापारी, यो मार्ग हरेक क्षेत्रका मानिसहरूलाई नजिक ल्याउने पुल बन्नेछ ।
जसरी एउटै आकाशले फेरि दुई शहरहरूलाई जोड्दैछ, त्यसरी नै मानिसका सपना, मित्रता र भविष्यका सम्भावनाहरू पनि एक–आपसमा गाँसिँदै छन् ।
त्यसैले आध्यात्मिक शान्तिको खोजीमा भएका पुन्यात्मादेखि सबै मानिसहरुले यदी काठमाण्डौ आउन चाहेमा वा कलकत्ताको इतिहास, मीठा परिकार र सांस्कृतिक जीवनशैलीको अनुभव लिन चाहेमा अब ढोका खुलिसकेको छ ।
अतितका सुन्दर अनुभवहरु सँगालेका प्रौढहरुले मात्रै होइन, आफ्ना पूर्वजको पसिनाले सिँचिएको भारतीय भूमि हेर्न रुचाउने युवाहरुका लागि पनि यो एक गज्जबको मौका हुने छ ।
अब मानिसहरुले तुरुन्तै टिकट सुरक्षीत गर्न सक्ने बुद्ध एयरले जनाएको छ । साथै, विश्वसम्पदाका धरोहर मानिएको यी दुई महानगरहरूलाई झनै नजिक ल्याउने यो ऐतिहासिक यात्राको हिस्सा बन्न पनि कम्पनीले आग्रह गरेको छ ।
‘यो केवल यात्रा होइन । साझा कथाहरू, अनुभवहरू र भविष्यका सम्भावनाहरूको पुनः आगमन हो’, कम्पनीले आफ्नो विज्ञप्तीमा भनेको छ, ‘यो सेवा हजारौं यात्रुहरूका सपना पुरा गर्ने, अनुभवहरू बाँड्ने र दुई देशलाई अझ नजिक ल्याउने माध्यम बन्नेछ ।’
