काठमाडाैं । नेपाल उद्योग वाणिज्य महासंघका अध्यक्ष चन्द्र प्रसाद ढकालले नेपालको निर्यात वार्षिक रूपमा १० खर्ब रुपियाँसम्म पुर्याउन सकिने सम्भावना रहेको बताए ।
बुधबार काठमाडौंमा महत्वपूर्ण व्यवसायिक व्यक्ति (सिआइपी) सम्मान प्रदान कार्यक्रममा बोल्दै अध्यक्ष ढकालले विदेशी लगानीको वर्तमान अवस्था कुल गार्हस्थ्य उत्पादनको ०.२ प्रतिशत रहेको उल्लेख गर्दै केही वर्षमै १० प्रतिशतसम्म पुर्याउन सकिने धारणा राखे।
उनले निजी क्षेत्र र महासंघले लगानी प्रवर्द्धन तथा आर्थिक सुधारका लागि नीति निर्माण तहमा निरन्तर पैरवी गर्दै आएको उल्लेख गरे।
‘सरकारले कानुनी सुधारदेखि नीति समायोजनसम्म सहयोग पुर्याउँदै आएको छ, जसका लागि हामी आभारी छौँ,’ ढकालले भने। उनले सुधार आयोगको सिफारिशलाई सरकारको बजेट तथा मौद्रिक नीतिमा स्थान दिइएको कुरामा पनि सन्तोष व्यक्त गरे।
सिआइपी सम्मानले व्यवसायीहरूलाई सम्मानित भएर अझ उत्साहका साथ व्यवसाय गर्न प्रेरणा दिने बताउँदै अध्यक्ष ढकालले आगामी दिनमा निश्चित मिति तोकेर ‘सिआइपी डे’ मनाउने प्रस्ताव समेत राखे। उनले निजी क्षेत्रको मर्यादाक्रम सुनिश्चित गर्न सरकारले विशेष ध्यान दिनुपर्ने सुझाव पनि दिए।
सरकार–निजी क्षेत्र सहकार्यमा आधारित यस्तो पहलले नेपालको आर्थिक रूपान्तरणमा महत्त्वपूर्ण योगदान पुर्याउने विश्वास व्यक्त गरिएको छ।
