काठमाण्डौ । मदन भण्डारी मेमोरियल कलेजमा अभिव्यक्ति स्वतन्त्रता र पत्रकारिताको भविष्यमा केन्द्रित विचारमूलक प्यानल छलफल सम्पन्न भएको छ । कलेजको अडिटोरियममा आज आयोजित उक्त छलफलमा विज्ञहरूले सञ्चार क्षेत्रका बदलिंदो स्वरूपबारे गहिरो सोच र संवादको आवश्यकता औँल्याएका छन् ।
कलेजको पत्रकारीता विभागअन्तर्गतको सञ्चार अध्ययन केन्द्र (सिएस्सी) को आयोजनामा कार्यक्रम दुई महत्वपूर्ण सत्रमा सम्पन्न भयो ।
पहिलो सत्र “फ्रिडम अफ एक्सप्रेसन भर्सेस राइट टु प्राइभेसी” शीर्षकमा केन्द्रित थियो, जसको सहजीकरण विद्यार्थी सुप्रिया राईले गर्नुभयो । डिजिटल युगमा अभिव्यक्तिको अधिकार र व्यक्तिगत गोपनीयताको सन्तुलनबारे वक्ताहरूले विविध धारणा राखेका थिए ।
क्यानडाको ओट्टावा विश्वविद्यालयमा पत्रकारिता प्राध्यापन गरिरहनु भएका प्रा. भानुभक्त आचार्यले अभिव्यक्ति स्वतन्त्रताको नीतिगत र व्यावहारिक पाटोबारे बताउनुभयो । डिजिटल मिडिया फाउन्डेसनका संस्थापक अध्यक्ष प्रवेश सुवेदीले समावेशी डिजिटल वातावरण, साइबर स्पेसमा व्यक्तिको अधिकार, डाटा ब्रिच र सुरक्षाको विषयमा प्रकाश पार्नुभयो ।
पूर्व पत्रकार तथा अधिवक्ता पवित्रा राउतले डिजिटल अधिकारसम्बन्धी कानुनी पक्षबारे महत्वपूर्ण विचार प्रस्तुत गर्नुभयो भने मिडिया अनुसन्धानकर्ता तथा परामर्शदाता उमेश पोखरेलले अन्तर्राष्ट्रिय सन्दर्भमा सञ्चार स्वतन्त्रता र सूचनाको पहुँचबारे चर्चा गर्नुभयो । साथै, सामाजिक सञ्जालमा देखिएको नकारात्मक ट्रेन्ड र कन्टेन्टको नाममा भइरहेको गैर–जिम्मेवार अभ्यासबारे पनि छलफल भएको थियो ।
त्यसैगरी दोस्रो सत्रमा “इज जर्नलिजम डायिङ ? फ्युट्चर अफ जर्नलिजम इन नेपाल” शीर्षकमा गहन बहस भयो । विद्यार्थी दया दूदराजले सहजीकरण गर्नुभएको उक्त सत्रमा वरिष्ठ सञ्चारकर्मी तथा प्राध्यापकहरूले नेपालमा पत्रकारिताको वर्तमान अवस्था, विश्वसनीयताको संकट, र प्रविधिले ल्याएका अवसर/चुनौतीहरूबारे विचार प्रस्तुत गर्नुभयो ।
देशसञ्चारका प्रधान सम्पादक युवराज घिमिरे, नेपाल अनुसन्धान तथा पत्रकारिता केन्द्र (निमजिन) का प्रमुख सम्पादक रजनेश भण्डारी, पत्रकार बिनु सुवेदी, र त्रिभुवन विश्वविद्यालयका सहायक प्राध्यापक लेखनाथ पाण्डेले बजार व्यवस्थापन, सोसल मिडियामा प्रकाशित हुने मिस/डिसइनफर्मेसन, तथा दक्ष पत्रकार उत्पादनमा कक्षाकोठा र समाचार कक्षबीचको दूरी घटाउने उपायबारे बहस गर्नुभयो ।
कलेज प्रमुख डा. बाबुराम अधिकारीका अनुसार यस्ता कार्यक्रमले विद्यार्थी, प्राध्यापक र सञ्चारकर्मीहरूलाई विचार आदानप्रदान गर्न र जिम्मेवार पत्रकारिताको दिशा तय गर्न सहयोग पुर्याएको छ ।
कार्यक्रमका सहजकर्ता एवम् पत्रकारिता विभागका सदस्य सुनिल पौडेलले सञ्चार र अभिव्यक्तिका संवेदनशील पक्षहरूमा गम्भीर बहसको थालनी गर्दै युवा पुस्तालाई सूचित र सचेत बनाउने उद्देश्य सफल भएको बताउनुभयो ।
कार्यक्रममा सहायक क्याम्पस प्रमुख तारा प्रसाद गौतम (प्रशासन), प्रज्वलमान श्रेष्ठ (शैक्षिक), मदन भण्डारी मेमोरियल माविका प्रिन्सिपल कमल न्यौपाने, पत्रकारिता विभाग प्रमुख यामबहादुर दूरा, विभिन्न विभागीय प्रमुखहरू, शिक्षक, कर्मचारी तथा विद्यार्थीहरूको उल्लेखनीय उपस्थिति थियो ।
दुवै सत्रमा सहभागीहरूले सक्रियताका साथ प्रश्नोत्तर सत्रमा भाग लिएका थिए ।
