- खगेन्द्र फुयाँल
काठमाडाैं । प्रधानमन्त्री तथा नेकपा एमालेका अध्यक्ष खड्गप्रसाद (केपी) ओली सार्वजनिक चर्चाको विषय बनेका छन् ।
हुन त देशको बहालवाला प्रधानमन्त्री सार्वजनिक चासो र चर्चाको विषय बन्नु सामान्य नै हो । तर उनको विवादास्पद कार्यलाई लिएर यतिबेला उनको सर्वत्र आलोचना भइरहेको छ ।
प्रधानमन्त्री ओलीको विवादास्पद कार्यलाई लिएर सर्वसाधारण मात्र हैन, पार्टी भित्रपनि नेता कार्यकर्ता सन्तुष्ट छैनन । राजनीतिक भविष्य समाप्त हुने डरले पार्टीभित्र उक्त विषयमा बहस चलाउने पक्षमा भने केन्द्रीय तथा पोलिटव्युरो तहका काेही नेताहरु तयार छैनन ।
मुख्यगरी कर छली एंव् बालुवाटार जग्गा घोटाला प्रकरणमा जोडिएका व्यापारी मिनबहादुर गुरुङ्गले दान दिएकाे झन्डै एघार रोपनी भनिएको जग्गाको विषय हो । दशैंको अष्टमीका दिनमा प्रधानमन्त्री केपी ओलीको उपस्थितिमा किर्तिपुर मैत्रीनगरमा जग्गा दानकर्ता मिनबहादुर गुरुङ्गले एमालेको पार्टी कार्यालय निर्माणका लागि संयुक्त रुपमा जग पूजा (भवन शिल्यान्यास ) गरेका छन् ।
बडादसैंकाे घटस्थापना भन्दा केहीदिन अघि परेको अबिरल वर्षाले देशमा ठुलो जनधनको क्षति भयो । वर्षासंगै आएको बाढीले सयौं मानिसको मृत्युभयो भने अरबौको धन सम्पत्तिको क्षति भएको छ ।
अबिरल वर्षापछि आएको बाढीले पूर्वी तराईबाट काठमाडौं जोड्ने छोटो मार्ग वीपी राजमार्गको विभिन्न स्थानमा करिब बाह् किलोमिटर सडक रोशी खोलाले बगाएको छ ।
काठमाडौं उपत्यका सहित काभ्रे सिन्धुली मकवानपुर सिन्धुपाल्चोक रामेछाप लगायतका जिल्लामा बाढीपहिरोले धेरै ठाउमा सडक तथा पुलमा क्षति पुर्याएको छ । सुनकोशी नदीले सिन्धुली रामेछाप खोटाङ्ग लगायतका जिल्ला जोड्ने विभिन्न स्थानका पुल बगाएको भनिएको छ । यस्तै, काठमाडौंबाट हेटौडा जोड्ने छोटो दुरीको सडकखण्डमा पनि क्षति पुगेको छ ।
दसैंको मुखमा आएको प्राकृतिक विपत्तिले धेरै नेपालीलाई घरबारबिहीन बनाइदियो । उनिहरुले दसैं आए गएको थाहा समेत पाएनन् । बाढीपहिरो पीडितको सहयोगका लागि सरकारको राहत कोषमा करोडौं रकम संकलन भएको छ तर कोष परिचालन सम्बन्धि ठोस योजना सरकारसंग छैन ।
आफन्त गुमाएका घर परिवालाई सरकारले केही रकम त देला तर विस्थापित परिवारको पुन:स्थापना र बाढीपहिरोको मुख्य कारण भनिएको गैरकानुनी ढुंगाखानी नियन्त्रण गर्ने विषयमा सरकार अझै मौन छ ।
यसवर्षको बडादसैं करिव करिव सकिन लागेको छ । बाढीले क्षतिपुगेको सडकको डाइभर्सन त खुलेको छ तर, यात्रा सहज भने छैन । प्राकृतिक विपत्ति पछिको राहत उद्धार तथा पुननिर्माणमा सरकारको सक्रियता जहिल्यै सुस्त छ ।
रोशी खोलाले क्षतिपुर्याएको काभ्रेका विभिन्न स्थानमा अझैपनि नियमित सञ्चार तथा विद्युत सेवा नभएको गुनासो जनताले गरिरहेका छन् । बाढी पीडितहरु सरकारप्रति आक्रोशित छन भने त्यस क्षेत्रमा सरुवा रोगको महामारी फैलिने त्रास पनि उत्तिकै छ । यि यस्ता विषयमा सरकारको ध्यान गएको देखिदैन ।
संविधानको समयानुकूल संसोधन र जनताको निराशा चिर्ने मुल एजेण्डा लिएर प्रमुख दुई ठुला दल नेपाली कांग्रेस र एमाले मिलेर गठन भएको सरकार आफै बिना हराएको मृग झै भएको छ ।
असार ३० गते चौथोपटक प्रधानमन्त्रीमा नियुक्त भएको ओली सरकारलाइ न्यनतम साझा कार्यक्रम ल्याउनै दुइ महिना लाग्याे । सरकारकाे साझा कार्यक्रम एकातिर यात्रा अर्काेतिर जस्ताे अवस्थामा सरकार पुगेकाे छ । जनताकाे निराशा चिर्नेतर्फ भन्दा पनि सत्ता टिकाउनु नै सरकारकाे एकमात्र उदेश्य देखिन्छ । सत्ता हिस्सेदार दल नेपाली कांग्रेसका नेता शेखर कोइरालाले सरकारले जनताको हितमा गति लिन नसकेको स्वीकार गरिसकेका छन् ।
सार्वभौम नेपाली जनता र देशको हितमा सपथ खाएका प्रधानमन्त्री कुनै व्यक्ति र स्वार्थ समुहको गोटी किमार्थ हुनसक्दैनन् । उनि बिवादित व्यक्ति र संस्थाको हितमा ‘स्वार्थको द्वन्द्व’ लाई समेत ख्याल नगरी हिड्छन भने पार्टी कार्यालय त बन्ला तर देश भने वर्षोपछि धकेलिने पक्का छ ।
मूल्य अभिवृद्धि कर (भ्याट) छलीसम्बन्धी मुद्दामा मिनबहादुर गुरुङ्गद्वारा सञ्चालित भाटभटेनी सुपरमार्केट एन्ड डिपार्टमेन्ट स्टोर प्रालि दोषी ठहर भएको छ ।
सर्वोच्च अदालतको २०८० माघ १६ गते गरेको पूर्ण इजलासको फैसलामा भाटभटेनीले नक्कली भ्याटबिल बनाएर कर छलेको ठहर गरेको छ । उक्त फैसलामा भाटभटेनीले कर जरिवाना र थप दस्तुर तथा ब्याजसमेत गरी डेढ अर्ब रुपैयाँभन्दा बढी रकम सरकारलाई बुझाउनुपर्ने निर्णय गरेको थियो ।
त्यस्तै गुरुङ्ग बालुवाटार जग्गा घोटाला काण्डमा समेत जोडिएर धरौटी बुझाइ रिहा भएका व्यक्ति हुन । सुशासनको पक्षमा कठोर बन्नुपर्ने देशको बहालवाला प्रधानमन्त्री नै कर छली तथा जग्गा घोटालामा जोडिएका व्यक्तिले दिएको करोडौ मुल्यको घडेरी सहर्ष स्वीकार्नु आफैमा सुशासनको बर्खिलाप हो ।
सरकार गठन भएको एकसय दिन पनि नपुग्दै सरकारको दिनगन्ति गन्नेहरुका लागि यो घटनाले समर्थन गरेको छ ।
देश र जनताको नाममा सपथ खाएका प्रधानमन्त्री स्वार्थ बाझिएको विषयसँग जोडिनु पक्कैपनि जनताको सपनामाथिको तुषारापात हो । यो घटना स्वयम प्रधानमन्त्रीका लागि पहिलो गाँसमा ढुंगा भनेझै हुनसक्छ ।
