काठमाडौं । ब्राजिलको सर्वोच्च अदालतले माइक्रो ब्लगिङ्ग साइ एक्सलाई प्रतिबन्ध गर्ने फैसला गरेको छ ।
कानुनी प्रतिनिधि तोक्न विफल भएपछि ब्राजिलमा सामाजिक सञ्जाल एक्समाथि प्रतिबन्ध लगाइएको हो । ब्राजिलको सर्वोच्च अदालतका न्यायाधीश एलेसान्ड्री डी मोराइसले अदालतका सबै आदेशको पालना नगरेसम्म र जरिवाना रकम नतिरेसम्म एक्समाथि प्रतिबन्ध लगाउने आदेश दिएको अलजजिराले जनाएको छ ।
अदालतको आदेशसँगै ब्राजिलमा २४ घण्टाभित्र सामाजिक सञ्जाल एक्स बन्द हुने समाचरामा जनाइएको छ । न्यायाधीश मोराइसले एप्पल र गुगलजस्ता कम्पनीलाई तीनका ‘एप्लिकेशन स्टोर’बाट एक्सलाई हटाउन र आइओएस र एन्डरोइड प्रणालीमा ‘ब्लक’ गर्न पाँच दिनको समयसीमा तोकेका छन् ।
कसैले भर्चुअल प्राइभेट नेटवर्क (भीपीएन) प्रयोग गरेर एक्स चलाएको खण्डमा उनीहरूलाई ५० हजार ब्राजिलियन रियल (करिब ९ हजार अमेरिकी डलर) जरिवाना लिनसक्ने चेतावनी पनि दिएका छन् । समाचार संस्था रोयटर्सका अनुसार ब्राजिलको दूरसञ्चार निकायका प्रमुखले अदालतको आदेशको कार्यान्वयनका लागि प्रक्रिया सुरु गरिसकेको बताएका छन् ।
अमेरिकी अर्बपति इलन मस्कको कम्पनी एक्सलाई करिब ३० लाख डलर जरिवाना गरिएको हो । एक्सको आधिकारिक अकाउन्टमा राखिएको विवरणमा कम्पनीले ती माग सम्बोधन नगर्ने जनाइएको थियो ।
‘न्यायाधीश एलेसान्ड्री डी मोराइसले ब्राजिलमा एक्स बन्द गर्ने अपेक्षा गरिएको छ । त्यसैका आधारमा राजनीतिक प्रतिद्वन्द्वीमाथि अंकुश लगाउने उनको गैरकानुनी आदेश हामी पालना गर्नेछैनौं,’ एक्सको अकाउन्टमा लेखिएको थियो ।
एक्सका ब्राजिलमा २ करोड २० लाखभन्दा बढी प्रयोगकर्ता छन् । अदालतको आदेशपछि मस्कले न्यायाधीश मोराइसलाई अभिव्यक्ति स्वतन्त्रता ध्वस्त पारिरहेका एक तानासाहको संज्ञा दिएका छन् । अदालतले एक्सविरुद्ध राजनीतिक रूपले पूर्वाग्रही आदेश दिएको उनको दाबी छ ।
मोराइसले मिथ्या सूचना फैलाएको आरोप खेपेका दर्जनौं एक्स अकाउन्ट निलम्बन गर्न गत अप्रिलमा एक आदेश थिए । त्यस्ता अकाउन्ट ब्राजिलका पूर्वराष्ट्रपति जैर बोल्सोनारोका समर्थकका रहेको बताइएको थियो ।
न्यायाधीशले दिएको उक्त आदेशलाई लिएर लामो समयदेखि उत्पन्न विवादका माझ एक्समाथि प्रतिबन्ध लगाउने आदेश आएको हो ।
(याे सामग्री सञ्चारमाध्यमहरूकाे सहयाेगमा तयार गरिएकाे । )
