- खगेन्द्र फुयाल ।
कमलामाई नगरपालिका वडा नं २ भद्रकालीस्थित ढुंग्रेभञ्ज्याङमा ‘मञ्जरी रिसोर्ट एण्ड एग्रो होम’ सञ्चालनमा आएको छ । विपी राजमार्ग अन्तरगत सेल्फीडाँडाबाट केही तल राजमार्गसंगै देखिने लमजुङको घलेगाँउको झल्को दिने उक्त सुन्दर बस्तीमा यो रिसोर्ट अवस्थित छ ।
सिन्धुलीका पाँच जना युवा मिलेर झण्डै चार करोड रुपैयाँको लगानीमा उक्त रिसोर्ट सञ्चालनमा ल्याइएको हो । निर्माणकार्य पुरा नहुदै सेवा दिदै आएको रिसोर्टको हाल निर्माणकार्य सम्पन्न भई तिहार लगत्तै उद्घाटन गरिने रिसोर्टका व्यवस्थापक कार्तिकेश श्रेष्ठले बताउनुभयो ।
जिल्लाको ऐतिहासिक क्षेत्र सिन्धुलीगढी, सेल्फीडाडा र भद्रकाली मन्दिर भ्रमण गर्ने पर्यटकलाई लक्षितगरी निर्माण गरिएको भएपनि हाल विपी राजमार्ग हुदै यात्रारत हरकोहीको सेवामा रिसाेर्ट चौविसैघण्टा तयार छ ।
एकैसाथ सयजना भन्दा बढीलाई पाहुनालाई सेवा दिने लक्षका साथ स्थापना गरिएको रिसोर्टमा ४५ जनासम्मलाई रोेजगारी दिन सकिने श्रेष्ठ बताउनुहुन्छ । रिसोर्टमा तालिम तथा गोष्ठिका लागि सभाहल र वैवाहिक कार्यक्रमका छुट्टैहलका साथ सेवा उपलब्ध गराइने व्यवस्था रहेको छ ।
महाभारतक्षेत्रको सुन्दर छटामा अवस्थीत यो रिसोर्ट पारिवारिक वातावरणमा शान्त एवं चिसो हावापानीले सम्पन्न छ । तराइको उखरमौलो गर्मी होस या शहरको कोलाहलपूर्ण दैनिकी, यहाँको केही दिनको बसाई अत्यन्तै आनन्ददायी हुनसक्छ ।
लोकल खाना सहित बँदेलको मासु, लोकल कुखुरा र कालिजको मासुका परिकार सहित पाहुँनाको रोजाइका उत्कृष्ठ खाना उपलब्ध गराउनु यो रिसोर्टको विशेषता हो ।
यहाँ आउने पाहुनाको मनोरञ्जनका लागि आधुनिक पिङ, फोटो शेसनका लागि ऐतिहासिक कलाले सजाइएका फ्रेम र टाढाटाढासम्म देखिने पहाड र मधेशका दृश्यअवलाेकन अत्यन्तै लोभलाग्दा छन । आगामी दिनमा पाहुनाका लागि जिपलाईन र जिपसाइकलको समेत योजना बनाइएको व्यवस्थापक श्रेष्ठ बताउनुहुन्छ ।
रिसोर्ट औपचारिक सञ्चालनमा आएपछि प्याकेज प्रणाली सुरु गर्ने प्रबन्धक प्रविन दाहाल बताउनुहुन्छ । हाल पाहुनाका लागि बाइसवटा सुविधा युक्त कोठा व्यवस्था गरिएको छ । अर्को ठूलो हल पनि निर्माण भइरहेको छ । यहाँ आएका पर्यटकहरुले राम्राे वातावरण पाएकाले मन पराउनुभएको छ । रिसोर्टबाट सिन्धुलीमाढिका फाँटहरु देखिन्छन । मौसम सफा हुँदा सर्लाही महोत्तरी र भारतको बिहारका केही भूभागसमेत यहाबाट देख्न सकिन्छ ।’
मन्जरी रिसोर्टमा अहिले आउने अधिकांश पर्यटक आन्तरिक रहेका छन् । आगामी दिनमा विदेशी पर्यटक भित्याउने योजनासहित व्यवस्थापन पक्ष लागिरहेको छ । अहिले आएका पर्यटकलाई राम्रो सेवा सुविधा दिएर रिसोर्टको छुट्टै पहिचान बनाउने प्रयासमा व्यवस्थापन लागेकाे छ।
मन्जरी रिसोर्ट एग्रो (कृषि) रिसोर्ट भएका कारण स्थानीय फलफुल रिसोर्टमै उत्पादन गरेर पाहुनालाई दिने योजना बनाएका छन् ।
रिसोर्टले पाहुनका लागि आगामी दिनमा स्थानीयको सहकार्यमा स्थानीय कलाको प्रस्तुतिकरण गर्ने योजना समेत रहेको जनाएको छ ।
