पुस २८, काठमाडौँ । थानकोट-चित्लाङ सडक खण्डको सेतो पहरामा शनिबार नीजि कार दुर्घटना हुँदा चार जनाकाे मृत्यु भएकाे छ ।
थानकोटबाट चित्लाङतर्फ गइरहेको प्रदेश-३- ०१-०२३ च ६९८५ नम्बरको कार शनिबार दिउँसो दुर्घटना हुँदा काठमाडौं लाजिम्पाट बस्ने ओमकार तिवारी, महेशकुमार गौतम, कल्पना गौतम र श्रीयन्स गौतमको घटनास्थलमै मृत्यु भएको थानकोट प्रहरीले जनाएकाे छ ।
दुर्घटनामा ६ वर्षीय बालक घाइते भएका छन् । उनलाई उपचारको लागि ट्रमा सेन्टर लगिएको छ। उनको अवस्था पनि गम्भीर रहेकाे प्रहरीले जनाएकाे छ ।
कार सडकबाट करिब ६ सय मिटर तल खसेको थियो ।
शनिबार उनीहरू चित्लाङ घुम्न जाँदै गरेको हुन सक्ने प्रहरीको अनुमान छ । हेटौंडा-काठमाडौं छोटो दुरीको कुलेखानी, फाखेल, सिस्नेरी र चखेलको सडक मर्मत सम्भारका कारण सवारीसाधन चल्न रोक लगाइएका कारण सो सडक खण्डमा साना सवारी साधनको चाप बढ्दो छ ।
