२६ पुस, काठमाडौँ । सवारी साधानको अनुगमन तथा नियम तथा दुर्घटना न्यूनिकरणका लागि नयाँ प्रविधिको प्रयोग बढ्न थालेको छ ।
काठमाडौं महानगरपालिकाको सहयोगमा उपत्यका प्रहरीले लापरवाही तरिकाले चलाउने गाडीको नम्बरप्लेट र चालकले गाडी चलाउँदा कस्ता गतिविधि गरिरहेको छ भनेर रिड गर्ने क्षमताको अत्याधुनिक ‘अटोमेटिक नम्बरप्लेट रिकग्नाइजेसन क्यामेरा’ क्यामेराको प्रयोग ल्याएको छ ।
यसले चालकको गतिविधि नियन्त्रणमा सहयोग पुग्नेछ । सिटबेल्ट लगाएको छ कि छैन, चालकले धूमपान गरेर गाडी चलाएको छ कि ? फोनमा कुरा गरेर पो गाडी चलाएको छ कि ? भनेर पत्ता लगाउन उक्त क्यामेराले सहयोग गर्छ ।
उक्त क्यामेराले गाडीको नम्बरप्लेट र चालकको सिटसम्मकै गतिविधि फोटो खिचेर सर्बरमा पठाउने हुँदा ट्राफिकिङमा यसले ठूलो सहयोग गर्ने विश्वास गरिएको काठमाडौँ उपत्यका प्रहरले जनाएको छ ।
यसअघि प्रहरीलाई ‘हिट एण्ड रन’ का घटनामा व्यक्ति र गाडी पहिचान गर्न गाह्रो हुन्थ्यो, अब यो राखेपछि दुर्घटनाबाट भागेको गाडी पत्ता लगाउन सकिन्छ । कालो गाडी थियो भनेर पत्ता लागेपछि कालो गाडी जतिको नम्बरप्लेट क्यामेराले पहिचान गर्ने जनाइएको छ ।
केहीदिनयता काठमाडाैंका सडकमा जडान गरिएका उक्त क्यामेरा काठमाडौँ महानगरपालिकाको सहयोगमा जडान गरिएकाे जनाइएकाे छ । यसलाई अब विस्तार गर्दै लैजान जरुरी रहेको उपत्यका प्रहरीले जनाएको छ । अरु पालिकाले पनि सहकार्य गर्ने कुरा भइरहेको छ, अब यो आर्थिक वर्षभित्र काठमाडौँका नाकामा राख्ने योजना रहेको जनाइएको छ । रातिको समयका लागि समेत यसले काम गर्ने र गाडीको लाइट काटेर नम्बर क्याप्चर गर्ने क्षमता यसको रहने बताइन्छ ।
उपत्यकामा मात्र यस्ता प्रविधियुक्त एक सय ७० वटा क्यामरा राख्न लागिएको प्रहरीले जनाएको छ । फेसरिड क्यामेरा १० ठाउँमा, अटोमेटिक नम्बरप्लेट रिकग्नाइजेसन क्यामेरा १० ठाउँमा र भिडियो म्यानेजमेन्टसहितको क्यामेरा (एआई प्रविधिमा आधारित) एक सय ५० स्थानमा जडान गर्न लागिएको हो । उक्त प्रविधि जडानमा सिनर्जी आइटी सोलुसन काठमाडौँको प्राविधिक सहयोग रहेको छ ।
