काठमाडौं, मंङ्सिर ७ । नेपाल मानव अधिकार अन्तर्राष्ट्रिय फिल्म महोत्सव आज शनिबारबाट शुरु भएको छ ।
मानव अधिकार फिल्म सेन्टरको आयोजनामा मंसिर २३ गते देखि २६ गतेसम्म नेपाल मानव अधिकार अन्तर्राष्ट्रिय फिल्म महोत्सवको ११औं संस्करण हुन लागेको हो ।
प्रत्येक वर्ष मानव अधिकारसँग सम्बन्धित फिल्मका लागि आवेदन आह्वान गरिन्छ । महोत्सवमा २६ देशका मानव अधिकार सम्बन्धी ५४ फिल्म देखाइँने आयोजकले जनाएको छ । यो संस्करणको नारा ’सामूहिक अधिकार’ रहेको छ ।
नेपाल मानव अधिकार अन्तर्राष्ट्रिय फिल्म महोत्सवमा प्रदर्शन गरिने ५४ फिल्म भृकुटीमण्डपस्थित नेपाल पर्यटन बोर्डमा मंसिर २३ देखि २६ गते सम्म र चाबहिलस्थित चलचित्र विकास बोर्डमा मंसिर २४ र २५ गते देखाइनेछ ।
फिल्म हेर्न शुल्क नलाग्ने र सबैखाले उमेर समूहले फिल्म हेर्न सक्ने आयोजनक समतिले जनाएको छ ।
नेपाल मानव अधिकार अन्तर्राष्ट्रिय फिल्म महोत्सवमा लागि ६ महिना पहिला आवेदन खोलिएको थियो । विश्वभरबाट ७ सय भन्दा बढी आवेदन परेको जनाइएको छ । विश्वभरबाट आएका आवेदनमध्ये छनोट समितिले नेपालका १८ फिल्म र अन्य मुलुकका ३६ फिल्म छानेको छ ।
नेपाल मानव अधिकार अन्तर्राष्ट्रिय फिल्म महोत्सवमा प्रदर्शन गरिने फिल्मको मूल्याङ्कन तीन सदस्यीय निर्णायक मण्डलले गर्ने छ । निर्णायक मण्डलमा नेपालकी कलाकार तथा थिएटर आर्टिस्ट पशुपति राई, भारतकी फिल्म निर्माता तथा फिल्म प्रशिक्षक अनुपमा बोस र लन्डनका Participatory and Ethnographic Documentary Filmmaker माइकल ब्राउन रहेका छन् ।
निर्णायक मण्डलको निर्णयका आधारमा ५ उत्कृष्ट फिल्मलाई पुरस्कृत गरिनेछ ।
अन्तर्राष्ट्रिय फिचर प्रतिस्पर्धा, अन्तर्राष्ट्रिय सर्ट फिक्सन तथा ननफिक्सन र नेपाली सर्ट फिक्सन तथा ननफिक्सन विधामा नगद सहित पुरस्कार प्रदान गरिने छ। त्यस्तै महोत्सवमा एकजना उत्कृष्ट नेपाली महिला निर्देशकलाई पनि पुरस्कृत गरिनेछ।
यस वर्ष महोत्सवमा ’सिनेमा विकासको लागि राजनीतिक प्रतिवद्धता’ र ‘सामूहिका अधिकारः अन्तर्राष्टिय प्रतिवद्धता, अभ्यास र राज्यको दायित्व’ विषयमा राजनीतिकर्मी, अधिकारकर्मी र फिल्मकर्मीहरूबीच दुईओटा प्यानल छलफल पनि राखिएको छ।
महोत्सवमा मानव अधिकारसँग सम्बन्धित फोटो प्रदर्शनी पनि हुने जनाइएकाे छ ।
