काठमाडौँ । कार्तिक ४, मतगणना विवादले तिक्ततापूर्ण अवस्थामा पुगेको गैरआवासीय नेपाली संघ एनआरएनएको विश्व सम्मेलनको ११ औँ संस्करण अनिश्चित बनेको छ।
महेश श्रेष्ठ प्यानलका डा. केशव पौडेलले उपाध्यक्षमा नेपालबाट शून्य मत पाएपछि धाँधली भएको आरोप लगाउँदै पुन मतदानको माग गरेपछि अन्यौलको अवस्था सिर्जना भएको हो।
नयाँ नेतृत्व चयनका क्रममा भएको विवादपछि गैरआवासीय नेपाली संघ (एनआरएनए) को सम्पूर्ण कार्यक्रमहरु स्थगित भएको जानकारी अध्यक्षत्रय बद्री केसी, कुल आचार्य र रविना थापाले सूचनामार्फत गराएका छन्।
शुक्रबार हुने भनिएको ११ औँ विश्व सम्मेलनको समापन समारोहसहितका सम्पूर्ण कार्यक्रमहरु अर्को निर्णय नभएसम्मका लागि स्थगित भएको हो । विवादपछि समापन समारोहमा प्रमुख अतिथि हुने भनिएका प्रधानमन्त्री पुष्पकमल दाहाल ‘प्रचण्ड’ले कार्यक्रममा नजाने जानकारी आयोजकलाई गरनएका थिए।
