फागुन २१,काठमाडौँ महानगर प्रहरीले सुन्धारा आसपासका सडकमा व्यापार व्यवसाय गरिरहेका फुटपाथ व्यवसायीहरुमाथि २०८० फागुन १६ गते बेलुका कुटपिट तथा बल प्रयोग गरेको र तत्पश्चात् काठमाडौँ महानगर प्रहरी र फुटपाथ व्यवसायी बिच झडप हुँदा दुवैतर्फका ११ जना व्यक्तिहरु घाइते भएको भनिएको घटनालाई आयोगले गम्भीर रुपमा लिई अनुगमन गरिरहेको छ ।
आयोगले घटनाको सत्यतथ्य विवरण एवम् फुटपाथ व्यवसायीहरुसँग यस अघि गरिएको सम्झौताको कार्यान्वयन अवस्थासहितको जानकारी उपलब्ध गराउन काठमाडौँ महानगरपालिकालाई पत्राचार गर्नुका साथै फुटपाथ व्यवसायीहरु र सरोकारवालासँग जानकारी लिएको छ । काठमाडौँ महानगरपालिकाका प्रहरीहरुले फुटपाथ व्यवसायीहरुलाई रातको ८ बजेको समयमा कुटपिट गर्नुका साथै दुव्र्यवहार गरेको, कुटपिटबाट घाइते भएकाहरुको ट्रमा सेन्टरमा उपचार भइरहेको, व्यवसायीहरुको सामान जफत भएको र केही व्यवसायीलाई पक्राउ गरी थुनामा राखिएको लगायतका सूचना अनुगमनका क्रममा आयोगलाई प्राप्त भएको छ ।
चितवनमा भएको शालिन पोख्र्रेलको मृत्युको घटना सम्बन्धमा अनुसन्धान प्रारम्भ
त्यसैगरी, चितवनको रत्ननगर नगरपालिका – १० टाँडीस्थित एकता शिशु निकेतन बोर्डिङ स्कुलमा कक्षा ८ मा अध्ययनरत १३ वर्षीय बालिका शालिन पोखे्रल मिति २०८० फागुन १२ गते सोही विद्यालयको छात्रावासमा झुण्डिएको अवस्थामा मृत फेला परेको भनिएको घटनाको प्रहरी अनुसन्धानबारे आयोगले जानकारी लिइरहेको छ । यसै सन्दर्भमा घटनाको सत्यतथ्य विवरण उपलब्ध गराउन एकता शिशु निकेतन बोर्डिङ स्कूल र शव परीक्षण प्रतिवेदन उपलब्ध गराउन त्रिभुवन विश्वविद्यालय, शिक्षण अस्पताल, फरेन्सिक मेडिसिन विभाग, महाराजगञ्जलाई पत्राचार गरी घटनाबारे अनुसन्धान प्रारम्भ गरेको छ ।
उक्त घटनाको निष्पक्ष छानविन गरी दोषीलाई कानून बमोजिम कारबाही गर्न आयोग नेपाल सरकारलाई आग्रह गर्दछ । साथै, अनुसन्धान प्रभावित हुने कुनै पनि गतिविधि नगर्न आयोग सम्बन्धित सबैलाई अनुरोध गर्दछ ।
