असार १४, विराटनगर–कोशी प्रदेश सरकारको नेतृत्व गरिरहेको नेकपा एमालेले प्रदेश सभामा विश्वासको मत माग्ने जनाएको छ। बुधबार विराटनगरस्थित नेकपा एमालेको संसदीय दलको बैठकमा मुख्यमन्त्री हिक्मतकुमार कार्की नेतृत्वको सरकारले विपक्षी दलसंग विश्वासको मत माग्ने भएको हो।
९३ सिट रहेको प्रदेशमा सरकारका लागि आवश्यक ४७ सिट संख्या नहुँदा सत्ताको नेतृत्व गरिरहेको एमाले अल्पमतमा रहेको छ।सोही क्रममा बिहीबार सत्तामा रहेको दल एमालेले विपक्षी दल नेपाली काँग्रेससहित विपक्षी दलसँग विश्वासको मत माग्ने भएको एमाले कोशी प्रदेश प्रमुख सचेतक रेवतीरमण भण्डारीले जानकारी दिए।
बैठकपछि प्रमुख सचेतक भण्डारीले सरकारलाई निरन्तरता दिनका लागि प्रमुख प्रतिपक्षी दल नेपाली काँग्रेस लगायतसंग विश्वासको मत माग्ने र विश्वासको मत दिनुहुन अनुरोध गर्ने जानकारी दिए। सत्ता अघि बढाइरहेको एमाले सहमतिको सरकार बनाएर पुरै कार्यकाल टिकाउ सरकार बनाउनेतर्फ केन्द्रीत रहेको बताएका प्रमुख सचेतक भण्डारीले सरकार ढालेर अस्थिर अवस्था बनाउँदा जनतामा सन्देश नकारात्मक जाने प्रस्टाए।
उनले भने,‘हामी सरकारलाई निरन्तर ५ वर्ष टिकाएर लैजाने पक्षमा छौ। यसका लागि दलहरुले सहमति बनाएर सरकार गठन गर्न एक हुनुपर्ने अवस्था छ। सरकार अस्थिर बनाएर मध्यावधितर्फ अघि बढाउने काम गर्नुहुदैन।’
उनले एमाले नेतृत्वको प्रदेश सरकारलाई निरन्तर अघि बढाउन मात्र एक मतको आवश्यक परेकाले विभिन्न विकल्प तथा सम्भावना कायम रहेको बताए।त्यसैगरि, मुख्यमन्त्री कार्कीले विश्वासको मत लिनका लागि बिहीबार प्रदेश सभामा दिउँसो १ बजेका लागि आव्हान गरेका छन्।
बैठकपछि मुख्यमन्त्री कार्कीले सरकारले विश्वासको मत पाउनेमा विश्वस्त रहेको प्रतिक्रिया दिए।मुख्यमन्त्री तथा संसदीय दलका नेता कार्कीले भने,‘सरकारलाई टिकाउन १ सांसदको आवश्यकता हो। यसका लागि प्रदेश सभाको पहिलो बैठकमा विश्वासको मत लिने प्रक्रिया अघि बढ्नेछ। यसका लागि हामीले सबै दलसमक्ष विश्वासको मत दिन आग्रह गरेका छौँ।’
मुख्यमन्त्री कार्कीले एमाले र राप्रपाले विश्वासको मतका पक्ष मतदान गर्ने निर्णय गरेको जानकारी दिए।
