पर्सा । पेस्तोल देखाएर अपहरण गरी पैसा लुट्ने गिरोहलाई पर्सा प्रहरीले नियन्त्रणमा लिएको छ । वीरगन्ज महानगरपालिका–६ रेल्वे सडकखण्डमा पेस्तोल देखाएर वीरगन्ज–१५ भिस्वा निवासी विशाल कुमार पटवाको साथबाट अपहरणकारी गिरोहले ६ लाख ५० हजार रुपैयाँ लुटेको थियो ।
पक्राउ पर्नेमा वीरगन्ज–२४ रामगढवा बस्ने ३४ वर्षीय विजय महतो, वीरगन्ज–२ छपकैयाका सदाम अन्सारी, वीरगन्ज–११ का सन्तोष लामा, कलैया उपमहानगरपालिका–२३ का मुकेश पटेल, भारत विहार रक्सौलका इमाम अन्सारी, परवानीपुर गाउँपालिका–३ का नबाब हुसेन, वीरगन्ज–११ का रोशन थापा र मोजामिल मियाँ रहेका छन् ।
प्रहरीका अनुसार गत बिहीबार आफन्तलाई पैसा दिन आएका बेला अपहरणकारी समूहले पेस्तोल देखाएर पटवालाई मोटरसाइकलमा बसाएका थिए । उनको साथमा रहेको नगद लुटेपछि पटवालाई अपहरणकारीले वीरगन्जको भिस्वामा छाडेका थिए । प्रहरीलाई सूचना पाउनासाथ अनुन्धान अगाडि बढाइएको थियो ।
प्रहरी नायब उपरीक्षक दीपक गिरीका अनुसार खोजतलासकै क्रममा प्रहरीले रेल्वे रोडबाट त्यहीदिन अपहरणकारीलाई नियन्त्रणमा लिएको थियो । प्रहरी स्रोतका अनुसार पक्राउ परेका गिरोह यसअघि भारतको विभिन्न आपराधिक घटनामा समेत संलग्न रहेको अनुसन्धानको क्रममा खुलेको छ ।
उनीहरुको साथबाट अपहरणमा प्रयोग गरिएको पेस्तोल एक थान, ५ राउन्ड गोली, ४ लाख ९५ हजार नगद, एउटा भारतीय नम्बरसहित तीनवटा मोटरसाइकल बरामद भएको छ । पक्राउ परेका आठै जनाविरुद्ध अपहरण तथा शरीर बन्धक, डाँका, हतियार तथा खरखजनाना एवं संगठित अपराधसम्बन्धी कसूरमा थप अनुसन्धान भइरहेको जिल्ला प्रहरी कार्यालय पर्साका प्रवक्तासमेत रहेका डीएसपी गिरीले बताए ।
