कार्तिक १२, काठमाडौं । बंगालको खाडीमा विकसित ‘अनर्व’ चक्रवात भारतको ओडिशा हुँदै नेपालतर्फ अघि बढिरहेको छ। उक्त शक्तिशाली चक्रवातका कारण नेपालमा पनि भारी वर्षा र हिमपातको सम्भावना रहेको मौसमविद्हरूले जनाएका छन्।
सम्भावित वर्षा र त्यसबाट हुन सक्ने क्षतिलाई मध्यनजर गर्दै विभिन्न जिल्लामा सर्वसाधारणलाई सतर्क रहन आग्रह गरिएको छ। धानबाली भित्र्याउने समय र हिमाली क्षेत्रमा यात्राको सिजन भएकाले विशेष सतर्कता अपनाउन आग्रह गरिएको छ।
उक्त चक्रवातको असर आज बुधबारदेखि शनिबारसम्म रहने मौसमविद् तथा उपप्राध्यापक डा. विनोद पोखरेलले जनाएका छन्।
उनका अनुसार बिहीबार साँझदेखि कोशीदेखि लुम्बिनीसम्मका क्षेत्रमा मध्यमदेखि भारी वर्षाको सम्भावना रहेको छ।
