काठमाडौं, १२ भदौ । ट्रान्सपरेन्सी इन्टरनेशनल (टीआई) नेपालले यही भदौ १० गते भोटेकोशी र त्रिशूली नदी क्षेत्रमा आएको विनाशकारी बाढी–पहिरोका कारण भएको ठूलो जनधनको क्षतिप्रति गहिरो दुःख व्यक्त गरेको छ ।
संस्थाका अध्यक्ष मदन कृष्ण शर्माले भदौ १२ गते एक वक्तव्य जारी गर्दै यस विपदमा परी ज्यान गुमाउने आम नेपाली तथा विदेशी नागरिकहरूप्रति हार्दिक श्रद्धाञ्जली अर्पण गर्नुभएको छ। साथै, शोकसन्तप्त परिवारजनप्रति समवेदना प्रकट गर्दै घाइतेहरूको शीघ्र स्वास्थ्यलाभको कामना गरिएको छ।
विपदबाट सिर्जित क्षतिको गम्भीरतालाई ध्यानमा राखी खोजी, उद्धार तथा राहत कार्यलाई थप तीव्र र समन्वयात्मक बनाउन टीआई नेपालले नेपाल सरकारसँग जोडदार आग्रह गरेको छ।
प्रभावित नागरिकहरूको दीर्घकालीन पुनस्र्थापना, जीविकोपार्जन र पुनर्निर्माणका लागि नेपाल सरकारका साथै आम नागरिक, निजी क्षेत्र, नागरिक समाज र अन्तर्राष्ट्रिय साझेदारहरूबाट निरन्तर सहयोगको अपेक्षा गरिएको छ।
यस कठिन घडीमा सञ्चालन गरिने सम्पूर्ण राहत तथा पुनर्निर्माणका कार्यहरू मानवीय संवेदना, सुशासन, पारदर्शिता र जवाफदेहिताका साथ अगाडि बढाउन ट्रान्सपरेन्सी इन्टरनेशनल नेपालले सम्बन्धित सबै पक्षसँग हार्दिक आह्वान गरेको छ।
