काठमाडौँ — एनआईसी एशिया बैंक र नेपालका लागि अनर (Honor) ब्रान्डको आधिकारिक बिक्रेता इफिक्स नेपाल (EFIX Nepal) प्रा. लि. बीच ग्राहकहरूलाई सहज रूपमा स्मार्टफोन उपलब्ध गराउने सम्बन्धी एक द्विपक्षीय सम्झौता सम्पन्न भएको छ । ग्राहकहरूको डिजिटल बैंकिङ आवश्यकताहरू पूरा गर्दै उनीहरूको अनुभवलाई थप परिष्कृत बनाउने रणनीतिक उद्देश्यका साथ यो सहकार्य गरिएको बैंकले जनाएको छ ।
उक्त सम्झौतापत्रमा बैंकका तर्फबाट चिफ ट्रान्जेक्सन बैंकिङ नरेन्द्र मैनाली र इफिक्स नेपालका तर्फबाट आईटी म्यानेजर अश्विन गोपाल शर्माले हस्ताक्षर गर्नुभयो ।
सम्झौताअनुसार एनआईसी एशिया बैंकका क्रेडिट कार्ड प्रयोगकर्ताहरूले अब कुनै पनि डाउनपेमेन्ट बिना (शून्य डाउनपेमेन्ट) तथा शून्य प्रतिशत ब्याजदर (0% EMI) मा अनर ब्रान्डका स्मार्टफोनहरू खरिद गर्न सक्नेछन् । ग्राहकहरूले इफिक्स नेपालको आधिकारिक वेबसाइट efix.com.np मार्फत अनरका स्मार्टफोन खरिद गरी आकर्षक मासिक किस्ताबन्दीमा भुक्तानी गर्न सक्ने सुविधा मिलाइएको छ ।
यो योजना अन्तर्गत ग्राहकहरूले कुनै थप ब्याज नतिरी अधिकतम १२ महिनासम्मको अवधिमा रकम भुक्तानी गर्न सक्नेछन् । मासिक किस्ताबन्दी (EMI) प्रक्रियालाई सरल बनाउन ग्राहकले बैंकको अनलाइन पोर्टल instabuy.nicasiabank.com मार्फत सहजै आवेदन दिई आफ्नो खरिद रकमलाई ईएमआईमा रूपान्तरण गर्न सक्ने व्यवस्था गरिएको छ ।
यो सहकार्यको अर्को मुख्य विशेषता विदेशमा रहेका नेपालीहरूले समेत यसको लाभ लिन सक्नेछन् । विदेशमा रहेका नेपालीहरूले इफिक्स नेपालको वेबसाइटमा बैंकको अत्याधुनिक कार्डमा आधारित अनलाइन भुक्तानी गेटवे ‘साइबरसोर्स’ (Cybersource) प्रणालीमार्फत भुक्तानी गरी नेपालमा रहेका आफ्ना परिवार तथा आफन्तजनका लागि स्मार्टफोन उपहार पठाउन सक्नेछन् । यस साइबरसोर्स प्रणालीमा जुनसुकै राष्ट्रिय तथा अन्तर्राष्ट्रिय बैंकहरूद्वारा जारी गरिएका भिसा (Visa) र मास्टरकार्ड (Mastercard) प्रयोग गर्न सकिने व्यवस्था छ ।
एनआईसी एशिया बैंकले आफ्ना ग्राहकहरूलाई डिजिटल भुक्तानीको उच्चतम प्रयोगमार्फत समृद्ध बैंकिङ अनुभव प्रदान गर्न यो सहकार्यले महत्त्वपूर्ण भूमिका खेल्ने र ग्राहकहरूको आर्थिक भार कम गर्न मद्दत पुग्ने विश्वास लिएको छ ।
