ताप्लेजुङ / नेपाल टेलिकमले ताप्लेजुङको प्रसिद्ध तीर्थस्थल पाथीभरा क्षेत्रमा फोरजी सेवा सञ्चालनमा ल्याएको छ। वैशाख २१ गतेदेखि औपचारिक रूपमा सेवा शुभारम्भ गरिएको कम्पनीले जनाएको छ।
समुद्र सतहबाट करिब ३,७९४ मिटर उचाइमा रहेको पाथीभरा मन्दिर र आसपासका क्षेत्रलाई समेट्दै उच्च गतिको फोरजी नेटवर्क विस्तार गरिएको हो। यस सेवाबाट फुङलिङ नगरपालिका, फक्ताङलुङ गाउँपालिका, सिरीजङ्घा गाउँपालिका र पाथिभरा याङ्वरक गाउँपालिकाका विभिन्न वडाका बासिन्दा प्रत्यक्ष लाभान्वित हुनेछन्।
फोरजी सेवाको विस्तारसँगै तीर्थयात्रीहरूले मन्दिर दर्शनका क्रममा आफ्ना परिवारसँग सहज सम्पर्क गर्न सक्नेछन्। साथै, तस्बिर, भिडियो तथा लाइभ अपडेटहरू सामाजिक सञ्जालमा सजिलै साझा गर्न सकिने सुविधा पनि उपलब्ध भएको छ।
दुर्गम भौगोलिक क्षेत्रमा सञ्चार पहुँच विस्तार भएपछि शिक्षा, स्वास्थ्य तथा दैनिक जीवनमा सहजता आउने अपेक्षा गरिएको छ। आपतकालीन अवस्थामा उद्धार तथा सहयोगका लागि तत्काल सम्पर्क गर्न सकिने भएकाले यो सेवा अझ महत्वपूर्ण मानिएको छ।
त्यस्तै, पर्यटन प्रवर्द्धनसँगै स्थानीय व्यवसायीहरूले डिजिटल भुक्तानी प्रणाली, क्युआर कोड तथा अन्य अनलाइन कारोबारमार्फत व्यापार विस्तार गर्न सक्नेछन्।
नेपाल टेलिकमले “राष्ट्रको सञ्चार” अभियानअन्तर्गत देशका सुगमदेखि अति दुर्गम क्षेत्रसम्म आधुनिक दूरसञ्चार सेवा विस्तार गर्ने आफ्नो प्रतिबद्धता निरन्तर अघि बढाइरहेको जनाएको छ।
