कुखुराकाे फुलकाे मूल्यमा भारी गिरावट आएको छ । नेपाल लेयर्स कुखुरापालक संघले सोमबारदेखि लागू हुनेगरी नयाँ मूल्य घटाइएको जनाएको छ । नेपालमा उत्पादन बढेको र यही समयमा भारतबाट पनि अण्डा नेपाल भित्रिएपछि मूल्यमा गिरावट आएको संघका अध्यक्ष विनोद पोखरेलले जानकारी दिए ।
अब समर्थन मूल्यअनुसार ठूलो अण्डाकाे प्रतिक्रेट (३० वटाको) ३७५ र मिडियम ३३५ रुपैयाँ कायम गरिएको छ । यसअघि २२ माघमा ठूलो अण्डा प्रतिक्रेट ४३५ र मिडियम ४०५ रुपैयाँ रहेको थियो । ११ माघमा ठूलो अण्डा ४९५ रुपैयाँ र मिडियम ४७५ रुपैयाँ पुगेको थियो ।
गत मंसिरमा फुलको मूल्य हालसम्मकै उच्च भएको थियो । तत्कालीन समयमा फार्ममा ठूलो अण्डा ५६५ रुपैयाँ प्रतिक्रेटमा बिक्री भएको थियो । मझौलाको ५५० रुपैयाँ थियो ।
संघका अनुसार भारतीय सेतो फुल धेरै भित्रिएको र उत्पादन बढेका कारण यहाँको फुलले बजार र मूल्य पाउन नसकेको हो । भारतीय फुल रोक्न संघले सरकारी निकायसँग निरन्तर रूपमा माग गरिरहेको उहाँले जानकारी दिए ।
