बर्दिबास, माघ १९, लोक तथा दोहोरी संगीत केवल मनोरञ्जन होइन, समाजको भावना, भोगाइ र स्मृतिको दस्तावेज पनि हो । यही दस्तावेजलाई वर्षौंदेखि स्वर दिँदै आएका गायक बेल बहादुर परियारले आफ्नो नयाँ दोहोरी गीत ‘फूल खसिगो, माया बसिगो’ मार्फत फेरि एकपटक लोकसंवेदनालाई जीवन्त बनाएका छन् ।
मंगलबार बर्दिबासमा आयोजित एक औपचारिक समारोहबीच गीतको म्युजिक भिडियो सार्वजनिक गरियो । राष्ट्रिय लोक तथा दोहोरी गीत प्रतिष्ठान नेपाल, महोत्तरीको आयोजनामा गौतम होटलमा सम्पन्न कार्यक्रममा मधेश प्रदेशकी पूर्व राज्य मन्त्री सारदा देवी थापा र बर्दिबास नगरपालिकाका मेयर प्रह्लाद कुमार क्षेत्रीले संयुक्त रूपमा भिडियो विमोचन गरे । विमोचनपछि प्रोजेक्टरमार्फत गीत प्रदर्शन गरिँदा उपस्थित दर्शक–श्रोताले ताली र प्रतिक्रियामार्फत गीतलाई स्वागत गरे ।
गीतमा बेल बहादुर परियार र प्रतिमा अर्यालको स्वर छ । प्रेम, बिछोड र मानवीय सम्बन्धका उतार–चढावलाई लोकलयमा बुन्ने प्रयास गीतमा स्पष्ट देखिन्छ । शब्द तथा सङ्गीत स्वयं परियारकै रहेको यो गीतको एरेञ्ज, मिक्स र मास्टरिङ राजिव शाहले गरेका छन् । म्युजिक भिडियोमा सन्जिब ठकुरी र सुजाता भट्टराईको अभिनयले गीतको भावलाई दृश्यमा उतारेको छ । निर्देशन मिलन श्रेष्ठ, कोरियोग्राफी राजाराम सिंखडा र छायाङ्कन सन्तोष तिमल्सिनाले गरेका छन् ।
कार्यक्रममा बोल्दै मेयर प्रह्लाद कुमार क्षेत्रीले स्थानीय प्रतिभा र सिर्जनालाई स्थानीय भूमिबाटै सम्मान गरिनु सकारात्मक संकेत भएको बताए । उनले लोकसंस्कृतिको संरक्षण र कलाकारको प्रवर्द्धन नगरपालिकाको प्राथमिकतामा रहेको उल्लेख गर्दै गायक परियारलाई राष्ट्रिय स्तरको कलाकारका रूपमा स्थापित गराउन सहकार्य गर्ने प्रतिबद्धता व्यक्त गरे ।
प्रमुख अतिथि पूर्व राज्य मन्त्री सारदा देवी थापाले परियारको सांगीतिक यात्रालाई निरन्तर संघर्ष र साधनाको परिणामका रूपमा व्याख्या गरिन् । अपेक्षित प्रचार नपाउँदा पनि सिर्जनाबाट विचलित नभई अघि बढिरहनु प्रेरणादायी भएको बताउँदै उनले लोक कलाकारलाई चिनाउन सञ्चार माध्यमको भूमिका अझ जिम्मेवार हुनुपर्नेमा जोड दिइन् ।
स्वयं गायक परियारका लागि यो गीत केवल नयाँ सिर्जना होइन, लामो यात्राको अर्को मोड हो । राष्ट्रिय लोक तथा दोहोरी गीत प्रतिष्ठान नेपाल, महोत्तरीका अध्यक्षसमेत रहेका उनले विमोचन समारोहमा आफ्ना अनुभव साझा गर्दै आजको समयमा स्रष्टाले भोग्नुपरेका चुनौतीबारे खुलेर बोले । “दर्शक–श्रोताको माया नै कलाकारको सबैभन्दा ठूलो शक्ति हो,” उनले भने ।
२०५१ सालमा रेडियो नेपालबाट ‘जाग नेपाली वीर नेपाली’ गीत गाएर औपचारिक गायन यात्रा थालेका परियारले सिन्धुलीका सुसेलीहरू, गरौं है रमाइलो, मिठो सम्झना, सुनको थैली चाँदीको झुम्कना जस्ता गीतमार्फत लोक संगीतमा आफ्नो छुट्टै पहिचान बनाएका छन् । नयाँ गीत ‘फूल खसिगो, माया बसिगो’ पनि यही यात्राको निरन्तरता हो भन्ने विश्वास गरिएको छ ।
समारोहमा समाजसेवी, पत्रकार, राजनीतिक प्रतिनिधि तथा कला–संस्कृतिप्रेमीहरूको उल्लेख्य उपस्थिति रहेको थियो । कार्यक्रमको सञ्चालन बिनोद ढुङ्गेलले गरेका थिए । मिडिया पार्टनरका रूपमा ॐकार टेलिभिजनको लोकप्रिय अन्तर्वार्ता कार्यक्रम ‘पञ्चामृत’ रहेको थियो । गीतको म्युजिक भिडियो गायक परियारको आधिकारिक युट्युब च्यानल ‘बेल बहादुर परियार अफिसियल’ मार्फत सार्वजनिक गरिएको छ ।
गीतको लिङ्क :
https://youtu.be/EXUnaiSIqC8?si=uj3RY3q9Bs1WHRwq
